ताप्लेजुङ : नेपाली हाते कागज उद्याेगलाई टिक्नै समस्या !

साउन ६, २०७९ शुक्रबार २०:३४:४३ | केशवप्रसाद भट्टराई

ताप्लेजुङ – ताप्लेजुङको मैवाखोला गाउँपालिका ३ साँघुमा सञ्चालित गोरूजुरे हाते कागज उद्योगका सञ्चालक पहलमान चोङ्बाङले कोरोना सङ्क्रमणको महामारीअघि एक वर्षमा १५ सय कोरीसम्म नेपाली कागज बिक्री गर्नु हुन्थ्यो । कोरोना महामारीपछि भने नेपाली कागजको बिक्री घटेको उहाँले गुनासो गर्नुभयो । यसपालि भने ६ सय कोरी मात्रै बिक्री भएको चोङबाङको भनाइ छ । विदेशी बजारमा माग कम भएकाले घरैमै थन्क्याएर राख्नुपरेको उहाँले बताउनुभयो ।

‘हाम्रो प्रमुख बजार विदेश थियो । कोरोना सङ्क्रमणको प्रभावपछि विदेशीहरू सामान लिन आएका छैनन् । नेपाली बजारको माग सानो छ । अहिले सामान्य मात्रामा मात्रै बिक्री भएको छ’, चोङबाङले बताउनुभयो ।

बजार अभाव भएपछि उत्पादनकर्ताहरू आफैँले डायरी लगायतका सामग्री तयार गरेर बिक्री गर्ने गरेका छन् । ‘कागज नै बिक्री कम हुन थालेपछि डायरी, पेन्टिङ, विभिन्न किसिमका कार्ड बनाएर बिक्री गर्न थालेका छौँ’, फुङ्लिङमा रहेको छिरिङ नेपाली हाते कागज उद्योगका सञ्चालक छिरिङ लामाले भन्नुभयो, ‘यसो नगर्दा त कामदारलाई ज्याला दिन पनि नपुग्ने अवस्था भयो ।’

उत्पादन गरिएका सबै सामग्री बिक्री नहुँदा कामदार र कच्चा पदार्थ सङ्कलकलाई ज्याला दिन समस्या भएको चोङ्बाङ बताउनु हुन्छ । ‘मेरो उद्योगमा आठ परिवारलाई रोजगारी दिएको थिएँ । परिवारका दुई जनाले श्रम गर्दा पनि दैनिक १६ जनाले काम गर्थे । तर अहिले उत्पादित कागज बिक्री भएको छैन’, चोङ्बाङले भन्नुभयो, ‘लामो समयदेखि काम गरिरहेकालाई पनि घर पठाउनुपर्ने अवस्था आयो ।’

स्थानीयस्तरमा पाइने लोक्ता र अर्गेलीबाट नेपाली कागज बन्छ । यो कागज बलियो, लामो समयसम्म राख्न मिल्ने र धुल्याहा किराले नखाने भएकाले यसको प्रयोग बढी हुन थालेको लामाको बताउनु हुन्छ ।

अर्गेली (लोक्ता) नेपाली कागज बनाउन प्रयोग हुने मुख्य कच्चा पदार्थ हो । अर्गेलीलाई बोक्रा तासेर केमिकल प्रयोग गरी कागज बनाइन्छ । नेपाली कागज बनाउनका लागि बाहिरबाट ल्याउने भनेको केमिकल (कास्टिक सोडा) मात्रै हो । केमिकल बाहेकको कच्चा पदार्थ स्थानीयस्तरमै पाइन्छ । यस अघिसम्म नेपाली कागज जापानी मुद्रा (ऐन) बनाउन विदेश निर्यात हुने गरेको थियो ।

अन्तिम अपडेट: कात्तिक १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्