म्याग्दीको तातोपानी कुण्डमा बिरामीकाे चाप बढ्दाे, स्नान गर्ने समयतालिका निर्धारण

असोज १३, २०७५ शनिबार १४:४८:९ | प्रताप बानियाँ

म्याग्दी – वर्षायाम सकिएर बिरामीको चाप बढ्दै जान थालेपछि तातोपानी कुण्डमा बिरामीहरुले स्नान गर्नका लागि नयाँ समयतालिका निर्धारण भएको छ ।

प्राकृतिक चिकित्सालयको रुपमा विकसित हुँदै गैरहेको म्याग्दीको बेनी नगरपालिका–४, सिङ्गामा रहेको तातोपानी कुण्डमा डुब्न समय व्यवस्थापन गरिएको हो ।

पछिल्लोपटक कुण्डमा आउने बिरामीको चाप बढेपछि तातोपानी कुण्ड व्यवस्थापन समितिद्वारा महिला र पुरुषले स्नान गर्न छुट्टाछुट्टै पालो बनाइएको छ ।

म्याग्दी जिल्लासहित देशका विभिन्न स्थानबाट दिनहुँजसो कुण्डमा नुहाउन भनेर आउने बिरामीको भीड बढ्दै गएपछि महिला र पुरुषले नुहाउन आइतबारदेखि फरक–फरक समय छुट्याइएको तातोपानी कुण्ड व्यवस्थापन समितिले जनाएको छ ।

दैनिक रुपमा साढे पाँच घण्टाका दरले महिला र पुरुषलाई छुट्टाछुट्टै समयमा तातोपानी कुण्डमा डुबुल्की मार्ने व्यवस्था मिलाइएको तातोपानी कुण्ड व्यवस्थापन समितिका सहसचिव कुमार केसीले बताउनुभयो ।

हरेक दिन बिहान ६ बजेदेखि बेलुका साढे ४ बजेसम्म कुण्डमा स्नान गर्न सकिने उहाँले जानकारी दिनुभयो । महिला र पुरुष दुवैले पालैपालो हरेक दिन बिहान, दिउँसो र बेलुकाको समयमा स्नान गर्ने गर्दछन् ।

कुण्डमा डुब्नका लागि समितिले टिकटको व्यवस्था गरेको छ । १ दिनका लागि ५० रुपैयाँको टिकट लिए पनि प्रतिव्यक्ति तीनसय रुपैयाँ तिरेमा ११ दिनसम्म डुब्न पाइन्छ ।

कुण्डमा डुब्न भन्दै यसपटक पूर्वी नेपालको मोरङ र सिन्धुपाल्चोक जिल्लाबाट बिरामीहरु आएको कुण्ड व्यवस्थापन समितिका सहसचिव केसीको भनाइ छ । नेपालको विभिन्न जिल्लाका साथै तातोपानी कुण्डमा नुहाउन भारत, जापान र बङ्गलादेशबाटसमेत विदेशीहरु आउने गरेका छन् ।

यसैगरी पछिल्लो समय पर्यटकहरु पनि कुण्डमा स्नान गर्नका लागि आउँछन् । कुण्डभन्दा बाहिर रहेका तातोपानीका धाराहरु २४सै घण्टा खुला रहन्छन् ।

तातोपानीको कुण्डमा डुबुल्की मारेपछि ग्यास्ट्रिक, बाथरोग, गानोगोला, युरिक एसिड, हार्डजोर्नी दुख्ने, हड्डीको दुखाई, सड्केको, मर्केको, बज्रिएकोसहित चिसोका कारणबाट उत्पन्न सबै प्रकारका रोगहरु निको हुने जनविश्वास रहिआएको छ ।

कुण्डमा एकपटक आएर डुबेका बिरामीहरु पटकपटक आउने गरेका छन् । स्वदेश तथा विदेशका ठूला र महङ्गा अस्पतालहरुमा लाखौं रुपैयाँ खर्चिएर पनि रोग निको नभएका बिरामीहरु तातोपानी कुण्डमा आएर डुबेपछि उनीहरु निको भएर फर्कने गरेको कुण्ड व्यवस्थापन समितिले बताएको छ ।

कुण्डमा गएको वर्ष १६ हजार ९७८ जनाले स्नान गरेका थिए । बर्सेनि झण्डै ५० लाख रुपैयाँ आम्दानी हुने तातोपानी कुण्डबाट स्थानीय सरस्वती माध्यमिक विद्यालयमा अध्यापनरत ९ जना निजी शिक्षकको तलब भत्तामा लगानी गर्ने गरिएको छ ।

त्यस्तै बेनी नगरपालिकालाई वार्षिक रुपमा २५ प्रतिशत कर कुण्डले तिर्ने गरेको तातोपानी कुण्ड व्यवस्थापन समितिका अध्यक्ष विरेन्द्रमान शाक्यले बताउनुभयो ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्