जिल्ला हुलाक कार्यालय बझाङमा हिनामिना भएको बचत रकम फिर्ता

असोज १४, २०७९ शुक्रबार १४:३:१० | डीबी बिष्ट

बझाङ – जिल्ला हुलाक कार्यालय बझाङमा हिनामिना भएको पाँच करोड ५९ लाख रुपैयाँ बराबरको रकम सरकारले फिर्ता पठाएको छ । झन्डै एक हजार सात सय जनाले जम्मा गरेका बचत रकम सरकाले फिर्ता गरेको जिल्ला हुलाक कार्यालय बझाङका प्रमुख राजेन्द्रबहादुर बोहराले बताउनुभयो ।

२०७६ साल चैत १२ गते जिल्ला हुलाक कार्यालयमा बचत भएको रकम हिनामिना भएको खुलेको थियो । हुलाक कार्यालयमा बचत खाता खोली स्थानियवासीले रकम जम्मा गर्दै आएका थिए । बचत रकम हिनामिनाको आरोप लागेका जिल्ला हुलाक कार्यालयका तत्कालीन कार्यालय प्रमुख रणबहादुर कडायत र खरिदार शिवराज उपाध्यायको नाममा विशेष अदालतमा मुद्दा चलिरहेको छ । कडायत १५ लाख र उपाध्याय १२ लाख रुपैयाँ धरौटीमा छुटेका छन् ।

फिर्ता आएको रकम छिट्टै सबै बचतकर्ताको खातामा पठाउने कार्यालय प्रमुख बोहराले बताउनुभएको छ ।

सुर्मा गाउँपालिका वडा नम्बर २ का खडकबहादुर बोहराले आफ्नो खेतबारीमा फलेको आलु, चोतो, मुला, करेला, सिमी, भटमासलगायतका गेडागुडी तथा घिउ, माेही, दही बिक्री गरेर जम्मा गरेको रकम जिल्ला हुलाक कार्यलयमा बचत गर्दै जानुभयो । छोराछोरी एसईई पास भएपछि सहरतिर पठाउनु पर्ला भनेर बोहराले २०६८/६९ सालदेखि जिल्ला हुलाक कार्यालयमा रहेको बचत हुलाक कार्यालयमा खाता खोली रकम जम्मा गर्न थाल्नुभयाे । उहाँले झन्डै ११ लाख रुपैयाँ हुलाक कार्यालयबाट फिर्ता लिन बाँकी छ ।

उहाँले भन्नुभयाे, झन्डै तीन वर्षदेखि रकम फिर्ता लिन नसकेर निराश भइसकेकाे थिएँ । तर बुधवार सरकारले हिनामिना भएको रकम फिर्ता गरेको खबरले दङ्ग भएँ । अहिले भने निकै खुसी छु ।

यस्तै २०६७ सालमा कैलालीकाे चौमाला चोकका शिवराज पन्तले जिल्ला हुलाक कार्यालयमा छोरा त्रिलोक, छोरीहरू सुनिता र ममताको नाममा नाबालक खाता खाेल्नुभयाे । उहाँले श्रीमती र आफ्नो नाममा संयुक्त खाता चलाउँदै आउनुभएकाे थियाे । सदरमुकाम चैनपुरमा होटेल व्यवसाय गर्दै आउनुभएका पन्तले व्यापारबाट जम्मा भएको रकम हरेक दिन बेलुकीपख खातामा जम्मा गर्दै जानुभयाे । उहाँले ती खाताबाट झन्डै २२ लाख रुपैयाँ फिर्ता लिन बाँकी छ । उहाँले पनि पैसा फिर्ता पाउनका लागि निकै दाैडधुप गर्नुभयाे । तर बुधवार रकम फिर्ता भएकाे खबरले उहाँ दङ्ग पर्नुभयाे ।

यस्तै जयपृथ्वी नगरपालिका ४ की ७६ वर्षीय धन पाध्या र उहाँकी श्रीमती गुनकेशरीले बिहान/बेलुका गिट्टी कुटेर, खाद्यान्न बेचेर र दुग्धजन्य पदार्थ बिक्री गरेर झन्डै १० लाख रुपैयाँ जम्मा गर्नुभएकाे थियाे । उहाँहरू पनि पैसा नपाइने हाे कि भनेर चिन्तित हुनुहुन्थ्याे । तर बुधवार सरकारले बचतकर्ताकाे खातामा पैसा फिर्ता पठाएपछि उहाँहरू पनि खुसी हुनुभयाे ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्