काठमाण्डाै - पहिरोका कारण सुदूरपश्चिमका मुख्य राजमार्ग बन्द भएका छन् । डडेलधुरामा भीमदत्त राजमार्ग र केआईसिँह राजमार्ग बन्द भएकाे जिल्ला प्रहरी कार्यालय डडेलधुराले जनाएको छ ।

भीमदत्त राजमार्गको साहुखर्क र केआईसिँह राजमार्गको रडुवामा पहिरो गएको छ । लगातारको वर्षाका कारण सुदूर पहाडका राजमार्ग तथा ग्रामीण सडकहरु बन्द भएका छन् । यस्तै, पहिरो जाँदा महाकाली राजमार्ग पनि बन्द भएको छ ।

आज बिहान खसेको पहिराेले राजमार्गअन्तर्गत बैतडीको सिन्केलेक नजिक पहिरो खस्दा सडक बन्द भएको हो । सडक खुलाउन उपकरण पठाइएको जिल्ला प्रहरी कार्यालयका प्रहरी प्रवक्ता प्रहरी निरीक्षक लोकराज जोशीले जानकारी दिनुभयो ।

राजमार्ग बन्द हुँदा लामो तथा छोटो दूरीका गाडी चल्न सकेका छैनन् भने यात्रु बीच बाटोमै अलपत्र परेका छन् । सुदूरपश्चिम प्रदेशका पहाडी जिल्लाहरुमा वर्षाका कारण टेलिफोन र विद्युत् सेवासमेत बन्द हुँदै आएको छ। लगातार ठूलो वर्षा भइरहेकाले बन्द भएका सडक, विद्युत् लगायतका सेवा चाँडो सञ्चालन गर्न समस्या भइरहेको प्रहरीले जनाएको छ।