बेलायतका नयाँ प्रधानमन्त्री ऋषि सुनकले विगतका गल्ती सच्याउने र देशकाे अर्थतन्त्र सुधार्ने प्रतिबद्धता व्यक्त गर्नुभएको छ । 

राजा चार्ल्स तृतीयलाई बकिङ्घम राजप्रासादमा भेटेपछि उहाँबाट सरकार गठनको आह्वानपछि औपचारिकरूपमा प्रधानमन्त्री बन्नुभएका सुनकले पहिलो सार्वजनिक मन्तव्यमा ट्रस सरकारबाट विगतमा भएका गल्ती सच्च्याउने तथा राष्ट्रको आर्थिक स्थायित्व पुनर्स्थापना गर्ने प्रतिबद्धता व्यक्त गर्नुभएको हो । उहाँले त्यसका लागि गरिने निर्णयहरू कठिन हुने चेतावनी पनि दिनुभएको छ । 

‘अहिले हाम्रो देशले गहिरो आर्थिक सङ्कटको सामना गरिरहेको छ’, सुनकले प्रधानमन्त्री कार्यालयबाहिर पत्रकारहरूलाई भन्नुभयो । लिज ट्रसले आर्थिक वृद्धि सुधार गर्न चाहनु गलत नभए पनि त्यसमा गल्ती भएको उहाँको विश्लेषण थियो । आर्थिक वृद्धि बढाउन पूर्ववर्ती सरकारबाट भएका प्रयासले अमेरिकी डलको तुलनामा आफ्नो देशको मुद्रा अवमूल्यन भएको बताउँदै अघिल्लो सरकारका त्रुटि सच्च्याउन आफू प्रधानमन्त्री निर्वाचित भएको सुनकले तर्क गर्नुभयो । 

मन्तव्यकै क्रममा उहाँले आर्थिक स्थायित्व नै आफ्नो सरकारको पहिलो प्राथमिकता भएको दोहोर्‍याउनुभयो ।