जसपा र लोसपालाई मधेसमा धक्का, सिके राउतको पार्टी अगाडि

मंसिर ७, २०७९ बुधबार ११:४५:५० | उज्यालो सहकर्मी

सप्तरी - मधेसको राजनीतिबाट उदाएर प्रदेश र केन्द्र सरकारमासमेत सहभागी हुँदै आएका दुई मधेसवादी दलले यसपालिको चुनावमा धक्का खाएका छन् ।

महन्थ ठाकुर नेतृत्वको लोकतान्त्रिक समाजवादी पार्टी नेपाल (लोसपा) र उपेन्द्र यादव नेतृत्वको जनता समाजवादी पार्टी नेपाल (जसपा)को प्रारम्भिक नतिजा कमजोर देखिएको छ । यी दुई पार्टीले धक्का खाँदा मधेसमा भर्खरै उदाएको डा. चन्द्रकान्त राउत (सिके) नेतृत्वको जनमत पार्टीले अग्रता लिएको छ ।

जनमत पार्टीले मधेस प्रदेशको दुई सिटमा जित हात पारिसकेको छ । सप्तरी २ क र धनुषा ३ क मा यो पार्टीका उम्मेदवार विजयी भएका हुन् ।

प्रतिनिधि सभातर्फ सप्तरी २ मा जनमत पार्टीका अध्यक्ष डा. सीके राउतले फराकिलो अग्रता कायमै राख्नुभएको छ । जसपा अध्यक्षसमेत रहेका उपेन्द्रभन्दा दोब्बरभन्दा बढी मतसहित राउत अगाडि हुनुहुन्छ । राउतले मतान्तर बढाउँदै लैजाँदा यो क्षेत्रमा उपेन्द्र यादवे जित्ने सम्भावना कम हुँदै गएको छ । यहाँ २०७४ सालको चुनावमा तत्कालीन संघीय समाजवादी फोरमका अध्यक्ष उपेन्द्र यादवले फराकिलो मतान्तरले जित्नुभएको थियो । यसपालि यादव पराजित भएर राउत सांसद बन्ने सम्भावना बढ्दै गएको छ ।

संसदीय चुनावमै राउतको यो पहिलो सहभागिता हो । मधेसका अरु क्षेत्रको प्रारम्भिक मतपरिणाममा जसपा र लोसपाका अध्यक्षसहित शीर्ष नेताहरु फराकिलो मतले पछि देखिएका छन् । सत्ता स्वार्थमै सीमित भएको र मधेसका माग सम्बोधन गर्न नसकेको भन्दै यी दलप्रति त्यहाँका नागरिकले देखाउँदै आएको असन्तुष्टि यसपालिको चुनावमा देखिएको छ ।

पार्टी विभाजनको कारण पनि मधेसमा स्थापित यी दुई दललाई यसपालि धक्का लागेको छ । जसपाले मधेस प्रदेश सरकारमा पूरा ५ वर्ष गर्यो । केन्द्र सरकारमा पनि पार्टीका नेताहरुको लगातारजसो सहभागिता रह्यो । तर सत्तामा रहेको बेलामा मधेसको एजेन्डा सम्बोधन गराउन प्रभावकारी भूमिका खेल्न नसकेको गुनासो मधेसका नागरिकमा देखिंदै आएको छ । नागरिकको यो असन्तुष्टि यसपालिको चुनावमा अभिव्यक्ति भएको देखिन्छ ।

राउतको जनमत पार्टी अब मधेसमा वैकल्पिक दल बन्ने सम्भावना छ । यसपालिको चुनावमा जसपाले एमालेसँग र लोसपाले सत्तारूढ पाँच दलीय गठबन्धनसँग चुनावी तालमेल गरेको थियो ।

अन्तिम अपडेट: पुस ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्