कास्की - प्रतिनिधि सभा तथा प्रदेश सभा सदस्य चुनाव २०७९ अन्तर्गत कास्की निर्वाचन क्षेत्र नं ३ प्रदेश सभा '१' मा नेकपा एमालेका उम्मेदवार गणेशमान गुरुङ विजयी हुनुभएको छ । 

गुरुङले १४ हजार चार सय ७३ मत ल्याएर गण्डकी प्रदेश सभामा विजयी हुनुभएको हो । उहाँका निकटतम् प्रतिस्पर्धी नेकपा माओवादी केन्द्रका दुर्गादत्त भण्डारीले ९ हजार ६ सय ६२ मत ल्याउनुभयो । 

राष्ट्रिय प्रजातन्त्र पार्टीका केदारनाथ पौडेलले ३ हजार छ सय ९७ र हाम्रो नेपाली पार्टीका खिमप्रसाद तिमिल्सिनाले २ हजार ५ सय १५ मत प्राप्त गर्नुभएको निर्वाचन अधिकृतको कार्यालयले जनाएको छ । 

यसैगरी मङ्गोल नेशनल अर्गनाइजेशनका जीवनबहादुर गुरुङले ४ सय ५४, आमूल परिवर्तन मसिहा पार्टी नेपालका मोतिलाल परियारले १ सय ६८, स्वतन्त्र उम्मेदवार कोमलप्रसाद शर्माले २ सय २७ मत ल्याउनुभएको छ । 

यस्तै, यस क्षेत्रमा प्रतिनिधि सभाको मत गणना भइरहेकाे छ । पछिल्लो गणनाअनुसार प्रतिनिधि सभामा नेकपा एमालेका दामोदर पौडेल बैरागीले अग्रता लिनुभएकाे छ ।