दाङ – लुम्बिनी प्रदेशका मुख्यमन्त्री लिला गिरीले पाँच वर्षभित्र लुम्बिनी प्रदेशवासीलाई समृद्ध राजधानी हस्तान्तरण गरिने बताउनुभएकाे छ । लुम्बिनी प्रदेश सभाको छैठौं स्थापना दिवस समारोहलाई आज सम्बोधन गर्दै मुख्यमन्त्री गिरीले लुम्बिनी प्रदेशलाई मिनी नेपालका रुपमा विकास गर्न प्रदेश सरकार लागिपरेको पनि बताउनुभयाे ।

लुम्बिनीलाई समृद्ध बनाउने धेरै सम्भावना भएको बताउँदै मुख्यमन्त्री गिरीले भन्नुभयो, ‘हामीसँग धेरै सम्भावनाहरु छन् । चुनौती पनि त्यत्तिकै छन् । चुनौतिका बीचबाट सम्भावनाको खोजी गर्दै सरकार अगाडि बढ्नेछ र समृद्ध प्रदेश निर्माण गर्नेछ । आउँदाे पाँच वर्षभित्र प्रदेशवासीलाई समृद्ध राजधानी हस्तान्तरण गरिनेछ ।’

यस्तै मुख्यमन्त्री गिरीले संघीयताको मर्म अनुसार काम गर्ने पनि बताउनुभयाे । संघीयताको गलत व्याख्या र प्रचार भइरहेको भन्दै नागरिकलाई संघीयताको व्यावहारिक अनुभूति गराउनतर्फ प्रदेश सरकार लागिपर्ने उहाँको भनाइ थियाे ।

‘संघीयतालाई कमजोर बनाउने खालका टिप्पणी भइरहेका छन् । संघीयताले सिर्जना गरेका अवसरलाई नबुझेर संघीयतामाथि प्रहार गर्ने र गलत प्रचार गर्ने क्रम बढेको छ’, मुख्यमन्त्री गिरीले भन्नुभयो, ‘संघीयता विरोधी गतिविधि सिर्जना गर्नु देशको हित विपरीतको कार्य हो । यसतर्फ सबै सचेत हुनुपर्दछ ।’