काठमाण्डाै – नेपाल उद्योग वाणिज्य महासङ्घका वरिष्ठ उपाध्यक्षका उम्मेदवार रहनुभएका व्यवसायी उमेशलाल श्रेष्ठले महासङ्घको चुनावलाई थप फोहोर नबनाउन अञ्जन श्रेष्ठलाई समर्थन गरेको बताउनुभएको छ ।

बिहीवार वरिष्ठ उपाध्यक्षमा अञ्जन श्रेष्ठलाई समर्थन गर्दै उहाँले यस्तो बताउनुभएको हो । उहाँले महासङ्घको चुनावलाई थप फोहोर नबनाउन दोस्रो चरणको चुनावमा नजाने निर्णयमा पुगेको बताउनु भयो । उहाँले दोस्रो चरणको चुनावमा आफूले र अञ्जनले पनि चार/पाँच करोड रुपैयाँ खर्च गर्न सक्ने अवस्थामा भए पनि चुनावलाई फोहोरी नबनाउन आफूले अञ्जनलाई समर्थन गरेको बताउनुभयो ।

श्रेष्ठले महासङ्घको निर्वाचन पद्धति खराब भएको टिप्पणी गर्नुभयाे । उहाँले महासङ्घको विधानलाई पुनः लेखन गर्नुपर्ने बताउनुभयो । आफू बाचुन्जेल महासङ्घमा नै रहने उहाँकाे भनाइ छ । उहाँले महासङ्घको नयाँ नेतृत्वले वैशाख २ गतेदेखि महासङ्घलाई सबैको बनाउन सुझाव दिनुभयो ।

श्रेष्ठले महासङ्घका निर्वाचित नेतृत्व आउँदा दिनमा एक भएर काम गर्न आवश्यक रहेको बताउनुभयो । उहाँले महासङ्घको सदस्यता वितरणमा कडाइ गर्नुपर्ने बताउनुभयो ।