काठमाण्डौ – अमेरिकी पूर्वराष्ट्रपति डोनाल्ड ट्रम्प यौन  दुर्व्यवहार सम्बन्धी एक मुद्दामा दोषी ठहर हुनुभएको छ ।

उहाँलाई न्युयोर्कको एक अदालतले यौन दुर्व्यवहारमा दोषी ठहर्‍याउँदै पीडितलाई क्षतिपूर्ति बापत ५० लाख डलर दिनुपर्ने फैसला सुनाएको छ । 

एक म्यागेजिनकी लेखिका ई. जीन केरलले सन् १९९० मा ट्रम्पले आफूलाई यौन दुर्व्यवहार गरेको आरोप लगाउनुभएको थियो । साथै उहाँले ट्रम्पमाथि आफ्नो मानहानी गरेको आरोप समेत लगाउनुभएको थियो । 

यो मुद्दामा पूर्व राष्ट्रपति ट्रम्पलाई अदालतले दोषी ठहर्‍याएको बीबीसीले जनाएको छ ।

तर अदालतले जीन केरलले लगाएको बलात्कार आरोपमा भने ट्रम्पलाई दोषी ठहर्‍याएको छैन ।

ट्रम्पले अदालतको फैसलामा असन्तुष्टि जनाउनुभएको छ । साथै उहाँले फैसलाविरुद्ध अपिल गर्ने प्रतिक्रिया दिनुभएको छ ।

पोर्न स्टार स्टोर्मी डेनिल्सलाई पैसा दिएर दबाबमा राखेको अभियोगमा ट्रम्पमाथि अर्को फौजदारी मुद्दा पनि छ ।

७६ वर्षका ट्रम्पमाथि अवैध तरिकाले अर्बौँ डलरको सम्पत्ति जम्मा गरेको, ह्वाइटहाउसबाट महत्वपूर्ण कागजात गायब पारेको, राष्ट्रपति चुनावको परिणाम अस्वीकार गर्दै आफ्ना समर्थकलाई संसद भवनमा आक्रमणका लागि उक्साएकोलगायतका आरोप पनि छन् ।