म्याग्दीकाे अन्नपूर्ण गाउँपालिकाका दुई वडाकाे सीमा विवाद ३३ वर्षपछि सुल्झियाे

असार १८, २०८० सोमबार १३:२६:२२ | रासस

म्याग्दी - म्याग्दीको अन्नपूर्ण गाउँपालिकाका दुईवटा वडाका बासिन्दाहरुबीचको ३३ वर्षदेखिको सीमा विवाद समाधान भएको छ । अन्नपूर्ण गाउँपालिका–१ दोवा र २ भुरुङ्गतातोपानीका बासिन्दाबीच दुवै वडाको सीमा क्षेत्रमा पर्ने बस्ती, खेतीयोग्य जमिन, वन र चरन क्षेत्रको उपभोगका विषयमा विवाद रहँदै आएको थियो ।

गाउँपालिकाका अध्यक्ष भारतकुमार पुन, उपाध्यक्ष दिवा तिलिजा पुन, प्रमुख प्रशासकीय अधिकृत अमृत सुवेदी, दोवाका वडाअध्यक्ष दिलीप गर्बुजा, भुरुङ्गका वडाअध्यक्ष ओम फगामी, जिसस सदस्य देव गर्बुजा, वडा सदस्य र दुवै वडाका प्रतिनिधिहरुको बैठकले विवादलाई सहमतिमा टुङ्ग्याइएको हो ।

विसं २०४६/४७ सालमा गाविस विभाजन हुँदा दोवाका बासिन्दा बसोबास गर्दै आएको सुनारीको बस्ती, जग्गा र लेकको चरन तथा वन क्षेत्र प्राविधिक त्रुटिका कारण भुरुङ्ग तातोपानीको नक्सामा समावेश भएको विषयलाई लिएर दुवै गाउँका बासिन्दाबीच तीव्र विवाद रहेको थियो ।

सीमा विवादको विषयलाई लिएर असार ८ गते शुक्रवार दोवाका बासिन्दाले अन्नपूर्ण गाउँपालिकाको कार्यालय अगाडि नाराबाजीसहित प्रदर्शन गरेका थिए । नक्सामा जे भए पनि भोगचलन गर्दै आएको सिमानाअनुसार नयाँ नक्सा तयार पार्न प्रक्रिया अघि बढाउने र सीमा क्षेत्रको जङ्गल दुवै गाउँका उपभोक्ताले आफूलाई जहाँ पायक पर्छ त्यही उपभोग गर्ने २०७४ साल कात्तिक १९ गतेको सहमति कार्यान्वयन गर्ने निर्णय भएको छ ।

सीमा विवादको विषयलाई लिएर भुरुङ्ग तातोपानीका पूर्वगाविस अध्यक्ष कुलवीर राम्जाली, वडाअध्यक्ष फगामी र पूर्ववडा सदस्य बुद्धि पुनमाथि दोवाका बासिन्दाले सामाजिक सञ्जाल र प्रदर्शनका क्रममा लगाएको आरोपको दोवाका बासिन्दाका तर्फदेखि क्षमायाचना मागिएको छ ।

नक्साको त्रुटि सच्याएर नयाँ बनाउन विशेष गाउँसभाबाट निर्णय गरेर सङ्घीय सरकारसँग प्रक्रिया अघि बढाउने र दुई वडाको विकास योजनाका लागि बजेट विनियोजनमा भूगोलका आधारमा नभएर अहिलेकै अनुपातलाई आधार मान्ने सहमति पनि भएको भुरुङ्गका वडाअध्यक्ष फगामीले बताउनुभयो ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्