काठमाडौं – सहकारी संस्थाले पनि एटीएम कार्ड चलाउन पाउनु पर्ने माग राखिरहँदा राष्ट्र बैंकले भने त्यो अहिल्यै आवश्यक नभएको संकेत गरेको छ । 

राष्ट्र बैंकका निर्देशक रेवतीप्रसाद नेपालले अहिलेको सन्दर्भमा सहकारीहरुले एकल रुपमा एटीएम कार्ड चलाउनुभन्दा सहकार्य गरेर मोबाइल बैंकिङ तथा प्रविधिमैत्री कारोबार गर्नसक्ने बताउनुभयो । 

नेपाल बचत तथा ऋण केन्द्रीय सहकारी संघ (नेफ्स्कून) र कृषि, भूमि व्यवस्था तथा सहकारी मन्त्रालयको संयुक्त आयोजनामा भएको कार्यक्रमलाई सम्बोधन गर्दै नेपालले गाउँगाउँसम्म प्रविधिमैत्री कारोबार पुर्याउने माध्यम नै सहकारी बन्न सक्नुपर्ने बताउनुभयो । 

उहाँले सरकारले १० जनाभन्दा बढी काम गर्ने संस्थाका सबै कर्मचारीको अनिवार्य बैंकिङ खाता हुनुपर्ने अवधारणा अघि सारेको सन्दर्भ उल्लेख गर्नुभयो ।
साथै, त्यो खाता सहकारी तथा बाणिज्य बैंकहरु जुनमा पनि खोल्न सक्ने व्यवस्था मिलाइने बताउनुभयो ।  

नीति, थिति र प्रविधि नै सहकारीको मूल मर्म रहेकाले अबको युगमा कागजरहित प्रविधितर्फ सहकारी केन्द्रित हुनुपर्नेमा उहाँले जोड दिनुभयो । 

यस्तै इन्फो डेभलपर प्रालिका उमेशकुमार रघुवंशीले सहकारीहरुलाई प्रविधिमैत्री बनाउन आफूहरु आवश्यक प्राविधिक सहयोग उपलब्ध गराउन तत्पर रहेको बताउनुभयो । 

अहिले प्रविधिमैत्री नियम कानुनको अभाव रहेको भन्दै उहाँले सरकार पनि अहिले यसतर्फ केन्द्रित भएर काम गरिरहेको बताउनुभयो ।