कास्की - नेपाल बक्सिङ सङ्घको अध्यक्षमा राम अवाले दोहोरिएका छन् । नेपाल बक्सिङ सङ्घको बुधवार हिजाे पोखरामा भएको छैटौँ साधारण सभा अधिवेशनले अवालेलाई दोश्रो पटक अध्यक्षमा निर्वाचित गरेको हो ।

सङ्घको वरिष्ठ उपाध्यक्षमा अर्जुनबहादुर केसी र पाँच उपाध्यक्षहरुमा गणेशबहादुर भट्टराई, भोजराज सिटौला, सविन भट्टचार्य, ओमनारायण श्रेष्ठ र रामबहादुर गिरीलाई चयन गरेको छ ।

त्यस्तै, महासचिवमा मानबहादुर भण्डारी तथा सचिवमा पुष्करराज पन्त, कोषाध्यक्षमा गौतम सुखजु चयन भएका छन् । सङ्घको सदस्यहरुमा गोविन्द डंगोल, रेशम पुन, मिलनध्वज राना, बमबहादुर स्याङ्गतान, रेखा थापा मगर, रमेश अधिकारी, दुर्गा गहतराज, लक्ष्मण कार्की, सञ्जयकुमार पासवान र समर जङ्गबहादुर चन्द चयन भएका छन् ।

अधिवेशनको उद्घाटन गर्दै राष्ट्रिय खेलकुद परिषद् (राखेप) का सदस्य सचिव टङ्कलाल घिसिङले बक्सिङ खेललाई पुरानै अवस्थामा पुर्याउनु पर्ने बताए । उनले बक्सिङको इतिहास दोहोर्‍याउन निरन्तरताले मात्र नपुग्ने भन्दै खेल विकासमा पहिलेको जस्तै सफलता आवश्यकता रहेको बताए । 

सदस्य सचिव घिसिङले अन्तर्राष्ट्रिय प्रतियोगिताको तयारीका लागि बजेटको अभाव हुन नदिने तर आफूलाई परिणाम भने चाहिने बताएका छन् । उनले अहिलेदेखि नै ओलम्पिकको तयारी थाल्न निर्देशन दिएका छन् । उनले खेल सङ्घहरुले साधारण सभा र अधिवेशन नगर्ने गरेको भन्दै सबै सङ्घहरुलाई साधारण सभा तथा अधिवेशनहरु गर्न निर्देशन दिए ।