धवलागिरि आधारशिविर, चक्रीय पदमार्ग र सिम्कोस बगर जोड्ने पदमार्ग पहिराेले बगायाे

साउन ११, २०८० बिहीबार १२:२९:१७ | रासस

म्याग्दी - म्याग्दीको धवलागिरि गाउँपालिका–४ मा पर्ने धवलागिरि हिमालको आधार शिविर, चक्रीय पदमार्ग र सिम्कोस बगर गाउँ जोड्ने पदमार्ग पहिराेले बगाएको छ।

नाउराको भिरमा पर्ने उजलामा बुधवार हिजाे दिउँसो खसेको पहिराेले करिब ५० मिटर पैदलमार्ग बगाएपछि सिम्कोस बगर, धवलागिरि आधार शिविर र चक्रीय पदमार्गमा आवतजावत बन्द भएको हो । सडक सुविधा नपुगेको सिम्कोश–बगर म्याग्दीको भौगोलिकरुपमा विकट र दुर्गम बस्ती हो ।

बगरका बासिन्दासमेत रहेका वडासदस्य हरिप्रसाद तिलिजाले पहिराेले पैदलमार्ग बगाएपछि बगर गाउँमा आवतजावत बन्द भएको जानकारी दिनुभयो । 'बगर र सिम्कोस गाउँ प्राकृतिक नाकाबन्दीमा परेको छ', उहाँले भन्नुभयो, 'बगर हुँदै धवलागिरि आधार शिविर, हिमाल आरोहण र चक्रीय धवलागिरि पदमार्गमा जाने पर्यटकका साथै सिम्कोश बगर गाउँमा आवतजावत बन्द भएको छ ।'

पदमार्ग बगाएपछि बगर गाउँमा पुग्न र गाउँबाट बाहिर जान सकिएकाे छैन । गाउँ बाहिरको विद्यालय र क्याम्पसमा पढ्ने विद्यार्थी समस्यामा परेका छन् । बिरामीलाई अस्पताल पुग्न महँगो खर्च गरेर हेलिकप्टर चार्टर्ड गर्नुपर्ने बाध्यता सिर्जना भएको छ ।

धवलागिरि गाउँपालिकाका उपाध्यक्ष रेशम पुनमगरले बगर पुग्ने वैकल्पिक पदमार्ग पहिचान र मर्मत गरी आवतजावत सहज बनाउन पहल गर्ने बताउनुभयो । घोडेटो बाटो बन्नुअघिको पुरानो गोरेटोबाटो मर्मत गर्न प्राविधिक टोलीलाई अध्ययनमा पठाउने उहाँले बताउनुभयो ।

धवलागिरि चक्रीय पदमार्गमा पर्ने नाउराको भिरमा द्वन्द्वकालमा तत्कालीन नेकपा माओवादीले सुरु गरेको पदमार्ग निर्माणको काम विसं २०६३ सालमा नेपाली सेनाले पूर्णताः दिएको थियो । पदमार्ग बनेपछि बगर हुँदै धवलागिरि हिमालको आधार शिविरसम्म खच्चर पुग्न थालेका थिए ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

धवलागिरि आधारशिविर, चक्रीय पदमार्ग र सिम्कोस बगर जोड्ने पदमार्ग पहिराेले बगायाे

फाइल तस्बिर

तपाईको प्रतिक्रिया