रुसी भाडाको सेना वाग्नर समूहका प्रमुख येभगेनी प्रिगोजिन अफ्रिकामा रहेको पुष्टि भएको छ । अघिल्लो महिना रुसमा असफल विद्रोह गरेका प्रिगोजिन रहेको स्थानलाई लिएर विभिन्न टिप्पणी भइरहेको बेला उनले एक भिडियोमा आफू अफ्रिकामा रहेको बताएका हुन् ।

वाग्नर समूहको टेलिग्राम च्यानलमा पोस्ट गरिएको भिडियोमा प्रिगोजिन लडाकु पोसाकमा देखिएका छन् । भिडियोमा उनले वाग्नर समूहले अफ्रिकालाई ‘अधिक स्वतन्त्र’ बनाउँदै गरेको उल्लेख गरेका छन् । ‘हामी अफ्रिकी नागरिकलाई न्याय र खुशी दिइरहेका छौँ, इस्लामिक स्टेट र अलकायदाका लागि जीवन कठिन बनाएका छौँ ।’ उनले भनेका छन् ।

अहिले वाग्नर समूहका हजारौँ लडाकु अफ्रिकामा रहेको अनुमान छ । केही देशमा उनीहरू सरकारी सेनाको सहयोगी र केही देशमा विद्रोहीको सहयोगीको रूपमा लडिरहेका छन् ।

भिडियोमा वाग्नर समूहका प्रमुख प्रिगोजिनले आफूहरू अफ्रिकाको स्वतन्त्रताका लागि ५० डिग्रीभन्दा धेरै तापक्रममा लडिरहेको उल्लेख गरेका छन् । यस्तै सबै महाद्वीपमा रुसको प्रभावशाली उपस्थिति आफूहरूको लक्ष्य रहेको पनि उनको दाबी छ ।