नागरिकलाई दुःख दिने र ढिलासुस्ती गर्ने काम सह्य हुँदैन : उपप्रधानमन्त्री श्रेष्ठ

भदौ १०, २०८० आइतबार १७:३०:३६ | रासस

पर्सा – उपप्रधान एवम् गृहमन्त्री नारायणकाजी श्रेष्ठले सेवा प्रवाहमा नागरिकलाई अनावश्यक दुःख दिने र ढिलासुस्ती गर्ने काम सरकारलाई सह्य नहुने बताउनुभएकाे छ ।

जिल्ला प्रशासन कार्यालय पर्साको नवनिर्मित भवनको आज आइतवार उद्घाटन गर्दै उपप्रधानमन्त्री श्रेष्ठले नियमित प्रक्रियाबाट हुनुपर्ने कामका लागि अहिले पनि नागरिकले 'सोर्सफोर्स' लगाउनुपर्ने, चाकरी गर्नुपर्ने र घुस दिनुपर्ने अवस्था रहेकाले अब यस्तो काम सह्य नहुने बताउनुभयो ।

देशमा राजनीतिक परिवर्तन भए पनि त्यसकाे अनुभूति नागरिकले गर्न नपाएको उल्लेख गर्दै उहाँले नागरिकलाई परिवर्तनको अनुभूति हुने गरी काम गर्न कर्मचारीलाई निर्देशनसमेत दिनुभयो । संविधान र कानुनअनुसार नियमित प्रक्रियाबाट हुनुपर्ने काम सहज र सरलरूपमा नागरिकलाई उपलब्ध गराउन निर्देशन दिँदै उहाँले सार्वजनिक जग्गा गैरकानुनी रूपमा कब्जामा लिनेलाई सरकारले नछाड्ने स्पष्ट पार्नुभयो ।

भ्रष्टाचारका ठूल्ठूला काण्डको छानबिन शुरु गरी सरकारले थालेको सुशासनको अभियानमा सहयोग गर्न सबै पक्षसँग अपिल गर्दै उपप्रधानमन्त्री श्रेष्ठले विभिन्न बाधा, अवरोधका बाबजुद सरकारले भ्रष्टाचारका फाइलको छानबिन गरी निष्कर्षमा पुर्‍याएर दोषीलाई कानुनी दायरामा ल्याई छाड्ने प्रतिबद्धता व्यक्त गर्नुभयो ।

सरकार सुशासन, समृद्धि र सामाजिक न्यायलाई मूलमन्त्र बनाएर अघि बढेको उल्लेख गर्दै उहाँले सामाजिक, आर्थिक रूपान्तरण गरी देशलाई समृद्ध बनाउने र शान्ति प्रक्रियाका बाँकी कामलाई निष्कर्षमा पुर्‍याउनु सरकारको कार्यभार रहेको बताउनुभयो । मिटरब्याज पीडितलाई न्याय दिलाउने अभियान शुरु गरिएको चर्चा गर्दै उपप्रधानमन्त्री श्रेष्ठले कुनै कमी कमजोरी नगरि सबै पक्षको साथ लिएर मिटरब्याज पीडितलाई न्याय दिलाउन निर्देशनसमेत दिनुभयो ।

कार्यक्रममा वीरगञ्ज महानगरपालिकाका मेयर राजेशमान सिंहले वर्षाैँदेखि अतिक्रमण भएको सार्वजनिक जग्गा खोज्ने र अतिक्रमण मुक्त बनाउने अभियान शुरु गरिएको बताउनुभयो ।

जिल्ला प्रशासन कार्यालय पर्साको नवनिर्मित भवन छ करोड ५३ लाख रुपैयाँको लागतमा निर्माण गरिएको हो । नवनिर्मित तीन तले भवनबाट गएकाे वैशाखदेखि जिल्ला प्रशासन कार्यालयको कामकाज सञ्चालन हुँदै आएको छ ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्