खुला आकाशमुनि रात बिताउँदा...

कात्तिक १९, २०८० आइतबार ८:२३:३१ | रासस

जाजरकाेट - शुक्रवार बेलुकी खाना खाएर सुतेकी नलगाड नगरपालिका–३ की भावना पुनलाई मध्यरातमा आएको भूकम्पले बिउँझायाे। भूकम्पले उहाँकाे घर धुजाधुजा पार्याे ।

भूकम्पपछि उहाँकाे परिवारका सदस्य काेही खुला आकाशमुनि रात बिताइरहेका छन् भने कोही अस्पतालमा बिरामी कुरुवा बसिरहेका छन् ।

‍कुशे गाउँपालिकाका धनबहादुर सिंह पनि भूकम्पको त्रासका कारण त्रिपाल टाँगेर बाहिरै बसेकाे बताउनुहुन्छ । 'घरभित्र बसीसाध्यै छैन' उहाँले भन्नुभयो, 'परकम्प आइरहेका कारण कुन समय के हुन्छ थाहा छैन, मनभरि त्रासले बास गरेको छ ।'

उनीहरु मात्रै हैन, भूकम्पकाे त्रासका कारण जाजरकाेट र रुकुम पश्चिमका नागरिकहरु अहिले खुला आकाशमुनि रात बिताइरहेका छन् । जाजरकाेटकाे रामीडाँडा केन्द्रबिन्दु भएर शुक्रवार राति ११ बजेर ४७ मिनेट जाँदा ६ दशमलव ४ रेक्टरस्केलको भूकम्प गएपछि अहिलेसम्म २ सय ११ भन्दा धेरै पटक परकम्प गएको छ । भूकम्पमा परेर अहिलेसम्म जाजरकोट र रुकुम पश्चिममा गरी १ सय ५७ व्यक्तिको ज्यान गएको पुष्टि भएको छ । दुई सय जनाभन्दा धेरै जना घाइते भएका छन् । थुप्रै भाैतिक संरचनामा क्षति पुगेकाे छ ।

जाजरकोटका पाँचवटा पालिकामा सग्ला घर देख्नै मुस्किल छ । नलगाड नगरपालिका–१ बाट ८ सम्म, भेरी–१, ३ र ४ मा प्रायजसाे सबै घरमा क्षति पुगेकाे छ ।

त्यस्तै, छेडागाड, कुशे र बारेकोटमा ठूलाे क्षति पुर्याएकाे छ । यहाँका कुनै पनि घर बस्न योग्य नै नभएको अवस्था छ । मानवीय क्षतिका हिसाबले नलगाड पहिलो नम्बरमा छ । नलगाडमा मात्रै ५२ जनाको भूकम्पबाट ज्यान गएकाे छ । भेरी नगरपालिकामा ४२ जनाको ज्यान गएकाे छ ।

छेडागाड नगरपालिकामा एक जना, जुनिचाँदेमा एक जनाको ज्यान गएकाे छ। गम्भीर प्रकृतिका बिरामीलाई बाहिर सुविधासम्पन्न ठाउँमा उपचारका लागि लगिएको छ भने अन्य बिरामीको पालिकामा रहेकाे स्वास्थ्य संस्थामा उपचार भइरहेकाे छ । एक सय ५० जनाभन्दा बढीको उपचार जारी छ । अझै केहीले उपचार पाउन सकेका छैनन् ।

छेडागाड–७ मा भूकम्पका कारण घाइते भएका एक व्यक्तिको अहिलेसम्म उद्धार हुन नसकेको प्रमुख प्रशासकीय अधिकृत सिंहराज डाँगीले बताउनुभयो । त्यहाँ एम्बुलेन्स जान नसक्ने भएकाले समस्या भएको उहाँले बताउनुभयो ।

त्यस्तै, गाउँ–गाउँमा फोन सम्पर्क हुन नसकेका कारण अझै गाउँमा घाइतेकाे सङ्ख्या बढ्न सक्ने अनुमान गरिएकाे छ। पालिकाका मुकाममा रहेका घाइतेको उद्धार भइरहेकाे छ । अन्य गाउँमा भएका बिरामीको गाउँमै उपचार भएको पालिकाका प्रमुखहरूले बताएका छन् । भौतिकरूपमा कति क्षति भयो भन्ने कुनै यकिन तथ्याङ्क आउन सकेको छैन । मृतकको सनाखत अझै हुनसकेको छैन । अहिलेसम्म पालिकाको नाम र सङ्ख्याबाहेक अन्य कुनै विवरण आउन सकेको छैन ।

प्रधानमन्त्री पुष्पकमल दाहाल ‘प्रचण्ड’, ऊर्जामन्त्री शक्तिबहादुर बस्नेत, कर्णाली प्रदेशका आर्थिक मामिला तथा योजनामन्त्री बेदराज सिंहले शनिवार नै भूकम्प प्रभावित क्षेत्रको स्थलगत अवलोकन गरी जानकारी लिनुभएको थियो । शनिवार नै जिल्ला विपद् व्यवस्थापन समितिको बैठक बसी राहत र उपचारलाई व्यवस्थित बनाउन एक टोलीसमेत निर्माण गरिएको छ ।

राहत दिने र सहयोग गर्नेले एकद्वार प्रणालीबाट गर्न प्रमुख जिल्ला अधिकारी सुरेश सुनारकाे आग्रह छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

खुला आकाशमुनि रात बिताउँदा...

तस्बिर : रासस

तपाईको प्रतिक्रिया