धर्नामा बसेका निर्मलाको परिवारको स्वास्थ्य अवस्था बिग्रिँदै

चिकत्सकद्वारा धर्नास्थलमै स्वास्थ्य परीक्षण

कात्तिक २९, २०७५ बिहीबार १२:५३:१० | दुर्गा उपाध्याय

कञ्चनपुर – १३ वर्षीय बालिका निर्मला पन्तको बलात्कारपछि हत्या भएको लामो समयसम्म न्याय नपाएको भन्दै धर्नामा बसेका निर्मलाको परिवारो स्वास्थ्य अवस्था बिग्रिएको छ । घटना भएको साढे तीन महिना बितिसक्दा पनि दोषी पत्ता नलागेको भन्दै पीडित परिवारले आइतबारबाट जिल्ला प्रशासन कार्यालयको गेट अगाडि धर्ना सुरु गरेका थिए ।

पाँच दिनदेखि निरन्तर रुपमा धर्नामा बसेका कारण पछिल्लो समय निर्मलाका बुवाआमाको स्वास्थ्य अवस्था दिनप्रतिदिन बिग्रिँदै गएको छ । चिसोका कारण पीडित परिवारमा रुघाखोकी तथा ज्वरो आउनेजस्ता समस्या देखिएपछि बिहीबार स्वास्थ्यकर्मीको टोलीले स्वास्थ्य परीक्षण गरेका छन् ।

आफूहरु छोरीको न्यायका लागि धर्नामा बसे पनि सरकारी पक्षबाट कुनै वास्ता नभएको निर्मलाकी आमा दुर्गादेवी पन्तले बताउनुभयो । उहाँले धर्नाको पाँचौं दिन बितिसक्दा पनि सरकार पक्षका कुनै पनि अधिकारीले आफूहरुको मागका विषयमा चासो नदिएको गुनासो गर्नुभयो ।

यता, चिसोका कारण निर्मलाका बुवा यज्ञराजको अवस्था निकै कमजोर भएको छ । उहाँको रक्तचाप घटेर ६७ पुगेको चिकित्कको भनाइ छ । कमजोरीका कारण निर्मलाका बुवाको स्वास्थ्य अवस्था एकदमै बिग्रिएको महाकाली अञ्चल अस्पतालका डा. किशोर बोहराले बताउनुभयो ।

‘समयमै खानपिन नहुँदा र अनिदोका कारण बुवाको अवस्था निकै कमजोर छ’, डा. बोहराले भन्नुभयो ‘उहाँमा ज्वरो पनि देखिएको छ । हामी रगत, पिसाब, आरबीसी, डब्लुबीसी जाँचका लागि प्रयोगशालामा पठाएका छौँ ।’

चिकित्सकका अनुसार प्रयोगशालाबाट रिपोर्ट आएपछि मात्रै थप उपचारका लागि अन्त रिफर गर्नुपर्ने वा यति उपचार गर्ने भन्ने यकिन हुनेछ ।

यस्तै, निर्मलाको परिवारको स्वास्थ्य अवस्था बिग्रिदै गएपछि कञ्चनपुरका प्रमुख जिल्ला अधिकारी तारानाथ अधिकारी र प्रहरी प्रमुख एसपी कुबेर कडायतले धर्ना स्थलमा पुगेर स्वास्थ्यकर्मीसँग पीडित परिवारको स्वास्थ्य अवस्थाबारे जानकारी लिनुभएको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दुर्गा उपाध्याय

दुर्गा उपाध्याय कञ्चनपुरका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्