काठमाण्डौ – आठौँ संस्करणको राष्ट्रिय भलिबल च्याम्पियनशिपको उपाधिका लागि पुरुषतर्फ त्रिभुवन आर्मी क्लब र साविक विजेता हेल्प नेपाल खेल्ने भएका छन् । आज भएको दोस्रो सेमिफाइनलमा आर्मीले अर्को  विभागीय टोली नेपाल पुलिस क्लबलाई ३–२ ले हराउँदै फाइनल पुगेको हो ।

आज भएको पहिलो सेमिफाइनलमा गण्डकी प्रदेशलाई ३–० को सोझो सेटमा हराउँदै हेल्प नेपाल फाइनलमा पुग्यो । महिलातर्फ सशस्त्र प्रहरी बलको एपीएफ क्लब तेस्रो भएको छ । आज भएको खेलमा न्यू डायमण्ड महिला टोलीलाई ३–१ को सेटमा हराउँदै एपीएफ तेस्रो भएको हो ।

महिलातर्फको उपाधिका लागि भोलि विभागीय क्लब नेपाल पुलिस र एभरेस्ट भलिबल क्लब बुटवलबीच प्रतिस्पर्धा हुनेछ । प्रतियोगिताको विजेताले पाँच लाख, उपविजेताले दुई लाख र तेस्रो हुने टोलीले एक लाख २५ हजार रुपैयाँ पाउनेछ ।