अष्ट्रेलिया जानुपर्ने सुदीप चितवनबाट हराएर तेह्रथुममा भेटिए

मंसिर १, २०७५ शनिबार १८:५:१५ | राधेश्याम खतिवडा

चितवन – ६ दिनदेखि हराइरहेका चितवनको कालिका नगरपालिका वडा नम्बर ६ बाग्लुङ्गेटोलका २४ वर्षीय सुदीप सापकोटा तेह्रथुममा भेटिएका छन् ।

कात्तिक २६ गते सोमबार विदेश यात्राको लागि आवश्यक सामान खरिद गरी फर्कने क्रममा उनीबीच बाटोबाटै बेपत्ता भएका थिए । सापकोटाले अष्ट्रेलिया जान तयार पारेको डकुमेन्ट नक्कली भएको पुष्टि भएको छ । अष्ट्रेलिया जाने तयारीमा रहेका सुदीप नारायणगढमा सामाग्री किनमेल गरेपछि सुटकेससहित हराएका थिए ।

भारतको दिल्लीमा रहेको एक कलेजबाट कम्प्युटर इन्जिनियर पास गरेका सुदीपको आगामी मंसिर ४ गते अष्ट्रेलिया जाने विद्यार्थी भिसाका लागि टिकट समेत लिइसकेको जानकारी परिवारले पाएका थिए । त्यसै अनुसार उनको विदेश यात्राको तयारी भएको थियो । सुदीपले गएको असोज ३ गते सरिना पोखरेलसँग विवाह समेत गरेका थिए ।

सुदीपका बुवा गंगा सापकोटाले सुदीप भेटिएको र लिनका लागि तेह्रथुम गइरहेको बताउनुभयो । इलाका प्रहरी कार्यालय टाँडीका डीएसपी दयानिधि ज्ञवालीले सापकोटाले अष्ट्रेलिया जानका लागि तयार पारेको डकुमेन्ट नक्कली भएको बताउनुभयो ।

सुदीपलाई खोज्न भरतपुरबाट जुटपानी जाने सडक मार्गमा पर्ने जंगल क्षेत्रमा प्रत्येक दिन जनपथ प्रहरी, सशस्त्र प्रहरी र स्थानीयहरुले खोजतलास एवम् सर्च अभियान चलाएको थियो । मोबाइल टेलिफोनको कल डिटेल र ल्यापटपको संकेतका आधारमा प्रहरीले अनुसन्धान गरेको थियो ।

विभिन्न व्यक्ति तथा संघ संस्थाद्वारा सामाजिक सञ्जाल मार्फत बेपत्ता सुदीप सापकोटाको खोजी गरिदिन भन्दै आग्रह समेत गरेका थिए । सयौं फेसबुक प्रयोगकर्ताहरुले आ–आफ्नो फेसबुकमा पोस्ट तथा शेयर समेत गरेका थिए ।

यसरी भेटिए सुदीप

जब सुदीप हराए तब प्रहरीले खोजी कार्यमा सक्रियता बढायो । मोबाइल कल डिटेल र लोकेसनलाई प्रहरीले हेर्दै गयो । सुदीपले आफूले प्रयोग गर्दै आएको सीमकार्ड फाले । तर, उनको मोबाइल प्रयोग भइरहेको पाइयो ।

प्रहरीले मोबाइल मात्र होइन, सुदीपले प्रयोग गर्दै आएको ल्यापटपको आइएमइआई कोड नम्बर पत्ता लगाई खोजी कार्य अगाडि बढायो । पिछा गर्दै जाँदा उनी शनिबार तेह्रथुमको एक होटलमा रहेको पत्ता लाग्यो । इलाका प्रहरी कार्यालय चितवनका डीएसपी दयानिधि ज्ञावालीले मोबाइल र ल्यापटपको साहराका कारण सुदीपलाई पत्ता लगाउन सकिएको बताउनुभयो ।

नारायणगढ बजारमा सामान खरिद गरी पुल्चोकबाट साँझ ५ बजेको समयमा छोरा म्याजिक गाडी चढी क्याम्पस गेटतर्फ गएपछि हराएको सुदीपका बुवाले बताउनुभयो । सँगैै सामान खरिद गर्न गएका बुवा भने नारायणगढबाट मोटरसाइकलमा गौरीगञ्ज तर्फ लागेका थिए ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्