गएको आइतबार इथियोपियन एयरलायन्सको जहाज दुर्घटनापछि संसारभरका ४५ देशले बोइङ ७३७ म्याक्स ८ जहाजको उडान रोकेका छन् । बोइङ ७३७ विमान रोक लगाउनेमा २८ देश युरोपका छन् । 

यूरोपको २८ देश सहित चीन, अस्ट्रेलिया, मेक्सिको, ब्राजिल, अर्जेन्टिना, इंडोनेशिया, इथोपिया, दक्षिण अफ्रीका, मलेसिया, सिंगापुर, भियतनाम, ओमान, मोरक्को, मंगोलिया तथा दक्षिण कोरियाले पनि यो विमान उडानमा रोक लगाएका छन् ।  

आइतबार आदिसअबाबाबाट केन्याको नैरोवीका लागि उडेको इथियोपियन एयरलायन्सको बोइङ ७३७ म्याक्स ८ जहाज टेकअफ गरेको ६ मिनेटमै दुर्घटनामा परेको थियो ।

इन्डोनेसियाको लायन एयरले सञ्चालन गरेको यही मोडेलको विमान गएको वर्ष अक्टोबरमा उड्नासाथ इन्डोनेसियाको जाभा द्वीपमा खसेको थियो । विमानमा सवार सबै १८९ जना यात्रु र चालक दलका सदस्यहरुको घटनास्थलमै ज्यान गएको थियो । 

पाँच महिनाको अन्तरालामा नै एकै मोडलको जहाज दुर्घटनामा परेपछि सुरक्षाको कारण देखाउँदै विभिन्न वायुसेवा कम्पनीले बोइङ–७३७ म्याक्स ८ विमान उडानमा रोक लगाएका हुन् ।

लायन र इथियोपियन एयरलायन्सका दुर्घटनाग्रस्त दुबै जहाजमा धेरै उचाइ लिँदा समस्या आएको प्रारम्भिक अनुसन्धानले देखाएको छ । पछिल्लो दुर्घटना बोइङ कम्पनीका लागि ठूलो क्षति हो । कम्पनीले बोइङ ७३७ म्याक्सलाई पछिल्लो पुस्ताको उत्कृष्ट विमान भन्दै दाबी गरिरहेको थियो । यस सिरिजको जहाज करिब १० हजार उत्पादन भइसकेका छन् ।