नैकाप–कलंकी जाममा एक साधुसँगको साक्षात्कार

 असार २०, २०७५ बुधबार १०:३५:६ | मिलन तिमिल्सिना

मंगलबार काम विशेषले बानेश्वर जानु थियो । नैकाप नजिकै बस्ने मलाई त्यहाँबाट टेम्पो चढ्दा सजिलो र भाडा पनि सस्तो पर्दथ्यो । १२ बजे बानेश्वर पुग्नुपर्ने भएकाले टेम्पो चढ्न साढे १० बजे नैकापचोक पुगें ।

खाल्डाखुल्डी सडकमा जताततै हिलैहिलो । गाडीको घ्यारघ्यार र जाम उस्तै । सडकमा ठूला बस, ट्रक, ट्रिपरको ताँती । नैकापचोकमा गाडी पर्खनेहरुको उत्तिकै घुईंचो । नैकाप, मातातीर्थ, मच्छेगाउँ, थानकोट, नागढुंगा चल्ने सबै लोकल गाडीमा खुट्टा राख्ने ठाउँ थिएन । ठाउँ नभए पनि सबैलाई जसरी पनि गन्तव्यमा पुग्नु छ ।

गाडी पर्खेर बसेकाहरु कोही बल्लतल्ल झुण्डिए, कोही निराश भएर पर्खिरहेँ । बानेश्वर चल्ने टेम्पो बल्लबल्ल आइपुग्यो । उताबाट आएर फर्कनेबित्तिकै यात्रुले भरियो । म चढ्न सकिनँ ।


म नजिकै एकजना साधु पनि गाडी पर्खेर बसेका थिए । उनको साथमा एउटा टिनको बाकस, ठूलो पोका र कमन्डलु थियो । उनलाई पनि बानेश्वर जाने टेम्पो नै चढ्नु रहेछ । तर उनले पनि त्यो टेम्पो चढ्न सकेनन् ।

त्यसको आधा घण्टापछि अर्को टेम्पो आयो । त्यो पनि उतिखेरै उसैगरी भरियो । सिट भरिसकेको भए पनि ती साधु बाकस र पोको बोकेर बल्लतल्ल टेम्पोभित्र पसे । हातमा भएको लौरो भुईंमा राखे, बाकसलाई अलि कुनातिर घचेटे । तर उभिएरै जान तयार भएका उनलाई चालकले बस्न दिएनन् । सिट छैन, यतिका सामान राखेर उठेर जान पनि मिल्दैन भनेर हप्काए । साधु बिन्ती गर्दै थिए, तर चालकले उनको बिन्ती सुनेनन् । झर्नु कि झर्नु भनेपछि साधु निराश भएर ओर्लिए ।

मेरो र ती साधुको व्यथा मिल्यो । उनले पनि टेम्पो चढ्न पाएनन, मैले पनि पाइनँ । मलाई उनीसँग कुरा गर्न मन लाग्यो । तर उनले खुलेर कुरा गर्न मानेनन् । कहाँबाट आएको, कहाँ जान लागेको भनेर सोध्दा पनि केही भनेनन् । मलाई पनि कर गर्न मन लागेन । जहाँबाट आएका भएपनि उनी सार्वजनिक गाडी चढेर यात्रा गर्ने हामीजस्तै पीडित थिए ।

१२ बज्नै लाग्दा नैकाप चोकमा गाडी पर्खनेहरुको संख्या घट्दै गयो । कोही गाडीको ढोकामा झुण्डिएर गन्तव्यतिर लागे । कोही अटेसमटेस गर्दै बल्लतल्ल कोचिएर यात्रा गरे । कलंकीसम्म त हिँडेरै पुगिन्छ भनेर कोही बाटो लागे ।

त्यहीबेला बानेश्वर चल्ने अर्को टेम्पो आइपुग्यो । अलिअलि भएका यात्रु चढेर पनि टेम्पो भरिएन । ढिलै भए पनि टेम्पोमा बस्न पाएर म दंग परें । मसँगै रहेका ती साधुलाई आउनुहोस् सिट छ भनें । तर यतिकाबेर पर्खेर पनि उनी टेम्पो चढेनन् । अघिको टेम्पो चालकले जस्तै चढ्न नदिने हो कि भन्ने ठानेर होला उनी टिनको बाकस र पोको झुण्ड्याएर सडक पार गरे । सडकको अर्कोपट्टि पुगेर सरासर कलंकीतिर हिँडे ।


सिट भरिएपछि टेम्पो अघि बढ्यो । ‘अघि भर्खर सोल्टीमोडमा एकघण्टा जाममा परेर आएको, अहिले पनि कलंकी पुग्न उति नै बेर लाग्ने होला’ टेम्पो चालकले सुनाए ।

ला बेकार चढिएछ, बरु हिँड्नैपर्ने रहेछ भन्ने मनमा लाग्यो । तर हिँडेरै गएपनि ढिलो भैसकेको थियो । जति नै ढिलो भएपनि एकछिन मुख देखाएर फर्कनुपर्ला भन्ने सोचेर चुप लागें । ढुंगेअड्डा पुगेपछि जाम सुरु भयो ।

‘केपी ओलीले पनि केही नगर्ने भए’ चालकसँगैको सिटमा बसेका एक अधवैंशेले भने ।

‘गर्न नसके अर्को आउँछ’ चालकले उतिखेरै जवाफ फर्काए ।

‘को छ र खै अर्को पो ? यति जाबो सडक त खुरुखुरु बनाइरहेको भए उहिल्यै सकिन्थ्यो नि, जम्मै खान पल्केका, मुखले मात्र ठिक्क पार्ने हुन्’ ती यात्रुले भने ।

‘यस्तै हो हजुर, यो देश कहिल्यै उंभो लाग्दैन’ झ्यालबाट कलंकीचोकतिर हेर्दै चालकले निराशा पोखे ।

चालकको यो जवाफसँगै उनीहरुको गफ टुंगियो । तर कलंकीको जाम अझै खुलेन । कलंकी चोकसम्म पुग्नेहरु त्यहीँ झरेर बाटो लागे । बल्लतल्ल जाम खुल्यो । कलंकी चोक कटेपछि सडक छेउमा टेम्पो रोकियो ।


टेम्पोको अघिल्तिर हेर्दा अघि नैकापमा भेटिएका साधु टाउकोमा पोका र हातमा बाकस झुण्ड्याएर लखरलखर हिँडिरहेका रहेछन् । गाडी चढ्न नपाएपछि हिँडेका उनी गाडीभन्दा छिटो भए ।

उनी मात्र होइन, दिनहुँ कलंकीको जाममा फस्नेहरुलाई गाडी चढ्नभन्दा हिँड्न छिटो हुन्छ । तर हिलो, धुलो, धुवाँले पैदल हिँड्न पनि कहाँ सजिलो छ र ? न गाडी चढ्दा सुख छ, न पैदलै हिँड्दा ।  
 

अन्तिम अपडेट: मंसिर ६, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मिलन तिमिल्सिना

दुई दशकदेखि रेडियो र अनलाइन पत्रकारितामा संलग्न मिलन तिमिल्सिना समसामयिक विषयमा विश्लेषण र व्यंग्यमा दखल राख्नुहुन्छ। 

2 Comments

  • हेम प्रकाश श्रेष्ठ

    July 5, 2018, 6:37 a.m.

    पहुचवालाहरूको ईच्छा शक्ति नभएरै देश बिकाश हुन नसकेको हो ।

  •  0 Reply

  • sweta

    July 4, 2018, 2:04 p.m.

    कहिले विकाश होला खोई हाम्रो काठमांडू

  •  0 Reply

तपाईको प्रतिक्रिया

समाचार

लोकप्रिय

१

गुल्मीको धुर्काेटमा एउटै परिवारले चार सय मुरी धान फलायो

२

रुस–युक्रेन युद्ध झनै खराब अवस्थामा, रुसले आणविक हतियार प्रयोग गर्ने चिन्ता बढ्यो

३

अर्जेन्टिना विश्वकपका लागि छनोट : चीनलाई हराउँदै जापान छनोट नजिक

४

जहाजमा उड्ने पैसा नहुँदा विश्वकप क्रिकेट खेल्न नेत्रहीन टोली रेलबाटै पाकिस्तान प्रस्थान

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई