भरतपुर अस्पतालमा उपचार गराइरहेका युवक डिस्चार्ज

वैशाख १३, २०७७ शनिबार १९:१५:१६ | राधेश्याम खतिवडा

चितवन - कोरोना भाइरस (काेभिड १९) को सङ्क्रमण देखिएपछि भरतपुर अस्पतालको आइसोलेशन कक्षमा रहेका दुई जनामध्ये २७ वर्षीय युवा कोरोना भाइरसमुक्त हुनुभएको छ ।

दुई पटक गरिएको पीसीआर परीक्षणमा कोरोना नेगेटिभ देखिएपछि उहाँ भाइरसमुक्त हुनुभएको हो । भरतपुर अस्पतालका सूचना अधिकारी लिला पौडेलका अनुसार लगातार दुई पटक गरिएको परीक्षणमा उहाँको नेगेटिभ रिपोर्ट देखिएको हो । उहाँलाई शनिबार दिउँसो औपचारिक रुपमा डिस्चार्ज गरिएको छ ।

राप्ती नगरपालिका ८ निवासी ६५ वर्षीया आमा र २७ वर्षीय छोरामा कोरोना भाइरस देखिएको थियो । उहाँहरुलाई वैशाख ५ गते भरतपुर अस्पताल ल्याइएको थियो । उहाँसँगै रहेकी उहाँकी आमाको दोस्रो पीसीआर परीक्षण भने पोजेटिभ नै देखिएको छ ।

अस्पतालबाट डिस्चार्ज भए पनि उहाँ अस्पतालकै आइसोलेशनमा अलग्गै बस्नुभएको छ । आमा अस्पतालमा नै रहनुपर्ने भएकाले उहाँ आमालाई कुर्ने गरी अस्पतालकै छुट्टै क्वरेण्टीनमा बस्नुभएको अस्पतालले जानकारी दिएको छ ।

अहिले अस्पतालमा रहेका आमा छोरामा रोगको लक्षण नदेखिएको अस्पतालका सूचना अधिकारी पौडेलले जानकारी दिनुभयो । उहाँका अनुसार तीन दिनपछि फेरि आमाको स्वाब परीक्षण गरिने छ ।

सुरुमा र्‍यापिड डायग्नाेस्टिक टेस्ट (आरडीटी) मा आमाकाे अवस्था शङ्कास्पद देखिएपछि आमा र दुई जना छोराको पीसीआर परीक्षण गरिएको थियो । भरतपुर कोभिड-१९ प्रयोगशालामा आमा र एक जना छोराको पोजेटिभ देखिएपछि उहाँहरुलाई भरतपुर अस्पतालको आइसोलेशनमा राखिएको थियो । भरतपुरबाट स्वाब थप परीक्षणका लागि राष्ट्रिय जनस्वास्थ्य प्रयोगशाला पठाउँदा त्यहाँ पनि नतिजा पोजेटिभ आएको थियो ।

परीक्षणअघि आमा र दुई छोरा अस्पतालमा रहेको भए पनि एक जना छोरालाई नेगेटिभ देखिएपछि उहाँलाई तत्कालै डिस्चार्ज गरिएको थियो । शरीरबाट भाइरसमुक्त भए पनि कम्तीमा एक हप्ता क्वरेण्टीनमा राख्नुपर्ने चिकित्सकको भनाइ छ ।

गएको चैत ३ गते बेलायतबाट हङकङ हुँदै नेपाल आइपुगेका आमा छाेरा दुई दिन काठमाण्डौ बसेर घर आएका थिए । परिवारका सदस्य, उनीहरुसँग निकट भएका एम्बुलेन्स चालकदेखि अन्य व्यक्तिहरुलाई अहिले राप्तीको ब्रम्हनगरको क्वरेण्टीनमा राखिएको छ ।

आरडीटी टेस्टमा सबैको रिपाेर्ट नेगेटिभ देखिएको भरतपुर अस्पतालका अध्यक्ष डाक्टर भोजराज अधिकारीले जानकारी दिनुभयो ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्