भरतपुर कोरोना अस्पतालमा जुत्ता चप्पल बाटा र बाल्टिन खरिद खर्च ११ लाख !

वैशाख २४, २०७७ बुधबार १९:५४:३६ | राधेश्याम खतिवडा

चितवन - चोरी र अनियमितताको विषयमा विवादमा तानिएको भरतपुर कोरोना विशेष(अस्थायी)अस्पतालमा ११ लाख रुपैयाँको जुत्ता(बुट), चप्पल खरिद गरिएको विवरण सार्वजानिक गरिएको छ ।

कोरोना अस्पतालबाट भरतपुर अस्पतालमा बुझाइएको सामानको विवरणमा खरिद गरिएको भनिएको छ तर सामानको विवरण उल्लेख छैन । वाग्मती प्रदेश सरकारको सशर्त अनुदानमा प्राप्त एक करोड र भरतपुर महानगरपालिकाको ६ लाख ५० हजार गरी १ करोड ६ लाख ५० हजार रुपैयाँ अस्पतालमा खर्च भएको आर्थिक विवरणमा उल्लेख छ ।

भरतपुर कोरोना नियन्त्रण कार्यदलमार्फत सार्वजानिक गरिएको विवरणमा कार्यालय सञ्चालन तथा व्यवस्थापन खर्च अन्तर्गत ११ लाख ८६ हजार ८ सय २३ रुपैयाँ बराबरको जुत्ता(बुट),चप्पल, बाटा, बाल्टीन र स्टेशनरी सामान खरिद गरिएको देखिएको छ ।

१४ लाख ५० हजार रुपैयाँ बराबरको बजेट शिलिङ राखिएको कार्यालय सञ्चालन तथा व्यवस्थापन शीर्षकबाट यो रकम विभिन्न सप्लायर्सलाई भुक्तानी गरिएको विवरणमा उल्लेख छ ।

कोरोना अस्पतालबाट भरतपुर अस्पतालले सामाग्री बुझेको विवरणमा यो शीर्षक अन्तर्गत २८ वटा प्लाष्टिकका बाटा, २० वटा प्लाष्टिकका बाल्टी र ७ वटा जग किनेको विवरण छ ।

५० जोर चप्पल बुझेको विवरण छ तर,जुत्ता(बुट) खरिद गरिएको विवरण कहीँ कतै भेटिएको छैन । कोरोना अस्पतालबाट भरतपुर अस्पताललाई सामानको विवरण बुझाएको विवरणमा जुत्ता(बुट) खरिद भएको,प्रयोग गरिएको वा मौज्दात रहेको भन्ने कुनै विवरण छैन ।

भरतपुर कोरोना विशेष अस्पताल सञ्चालनका लागि बनाइएको ‘भरतपुर कोरोना नियन्त्रण कार्यदल’ले विज्ञप्तिमार्फत खर्च अनुमोदन गरेको जानकारी गराएपनि कार्यदलका सदस्यहरुले आफूहरुलाई जानकारी नभएको बताउँदै आएका छन् ।

अस्पतला सञ्चालन तथा व्यवस्थापनका लागि वाग्मती प्रदेश सरकारबाट चैत २० गते आएको शशर्त अनुदानको एक करोड रुपैयाँ रकम कोरोना अस्पतालको खातामा नै पठाइएको थियो ।

अस्पतालले दिएको विवरणअनुसार वैशाख १४ गतेसम्म ७४ लाख ४४ हजार ९९ रकम भुक्तानी भएको देखिएको छ । करेन्टीन खर्च ६ लाख ५७ हजार ५ सय, ट्वाइलेट बाथरुम पार्टेसन गर्दाको २५ लाख ४४ हजार ५ सय ४८, एयर कण्डिसनको ६ लाख २५ हजार, कर्मचारी पारिश्रमिक बापत १३ लाख ७७ हजार ५ सय ८० रकम गरी जम्मा ५२ लाख ४६ हजार २८ रकम भुक्तान गर्न बाँकी छ ।

अस्पतालले पीपीई र एन ९५ मास्कमा मात्रै भ्याटसहित करिब ३४ लाख खर्च गरेको देखाइएको छ । अस्पतालले दिएको जानकारीअनुसार अहिलेसम्म कार्यालय सञ्चालनमा ११ लाख ८६ हजार, औषधि खरिद मेसिनरी औजारमा सबैभन्दा धेरै ५२ लाख २८ हजार २ सय १० खर्च भएको छ । तर, ५२ लाख २८ हजारमध्ये करिब १८ लाखको हिसाब अस्पतालले देखाएको छैन ।

नेपाली कांग्रेस चितवनले सर्वपक्षीय अधिकार सम्पन्न छानविन समिति गठन गरी अस्पतालमा अहिलेसम्म भएका आर्थिक गतिविधिहरूको विवरण सार्वजनिक गर्न माग गरेको छ ।

कोरोना नियन्त्रण कार्यदलको बैठकले घटनाबारे छानबिन गर्न चितवन उद्योग संघका अध्यक्ष राजु पौडेलको अध्यक्षतामा तीन सदस्यीय छानबिन समिति गठन गरेको थियो ।

राजनीतिक हिसाबले वक्तब्य तथा टिकाटिप्पणी र सूचनाहरू सार्वजनिक भइरहेको भन्दै छानविन संयोजक पदमा रही काम गर्न आफू असमर्थ रहेको पौडेलले बताएका छन् ।

कोरोना सङ्क्रमितको उपचारका लागि भरतपुर महानगरपालिकाले बनाएको भरतपुर कोरोना विशेष अस्पतालका सामान राति कर्मचारीहरूले पोको पारेर लगेको भिडियो सार्वजनिक भएको थियो ।

कर्मचारीहरूले सामान चोरी गरेको भनेर समाचार सार्वजनिक भएपछि अख्तियार दुरुपयोग अनुसन्धान आयोगको टोलीले कागजपत्र नियन्त्रणमा लिएर अनुसन्धान गरिरहेको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्