काठमाण्डाै – निजी तथा सामुदायिक अस्पतालहरुले र्‍यापिड डायग्नाेस्टिक टेस्ट (आरडीटी) विधिमार्फत कोरोना परीक्षण गर्न पाउने भएका छन् ।  स्वास्थ्य तथा जनसङ्ख्या मन्त्रालयकाे अनुसार अनुमति लिएर निजी तथा सामुदायिक अस्पतालहरुले आरडीटी परीक्षण गर्न पाउने भएका हुन् ।

मन्त्रालयका प्रवक्ता डाक्टर विकास देवकोटाले कोरोना भाइरसको परीक्षणमा सहजता प्रदान गर्न निजी तथा सामुदायिक अस्पतालहरुलाई आरडीटी परीक्षण गर्न पाउने गरी निर्देशिका जारी गरिएको बताउनुभयाे । परीक्षण गर्न उपत्यकाभित्र रहेका अस्पतालहरुले स्वास्थ्य सेवा विभाग र बाहिरका अस्पतालहरुले प्रदेश स्वास्थ्य निर्देशनालयबाट अनुमति लिनुपर्ने व्यवस्था गरिएको छ ।

प्रवक्ता देवकोटाका अनुसार निजी अस्पतालहरुले जनस्वास्थ्य प्रयोशालाले सार्वजनिक गरेकाे सूचीमा उल्लेख गरेका आरडीटी किटहरुको मात्रै प्रयोग गर्न पाउनेछन् । परीक्षणपछि दैनिक रुपमा अस्पतालहरुले त्यसको विवरण राष्ट्रिय जनस्वास्थ्य प्रयोगाशालामा पेस गर्नुपर्ने छ ।

निजी तथा सामुदायिक अस्पतालहरुले आरडीटी परीक्षणबापत शुल्क लिन पाउनेछन् । किट खरिद गरेको मूल्यमा बढीमा २० प्रतिशत शुल्क लिएर परीक्षण गर्न पाउने मन्त्रालयका प्रवक्ता डाक्टर विकास देवकोटाले बताउनुभयो ।