हात कसरी धुने ?

 असोज १३, २०७७ मंगलबार २०:३८:५९ | उज्यालो सहकर्मी
unn.prixa.net

काठमाण्डौ – सही तरिकाले साबुन पानीले हात धोए कोरोना भाइरसलगायत अन्य रोग र सङ्क्रमणबाट जोगिन सकिने विज्ञले बताएका छन् ।

स्वास्थ्य मन्त्रालयको नियमित प्रेस ब्रिफ्रिङमा मन्त्रालयका प्रवक्ता डाक्टर जागेश्वर गौतमले कोरोनाविरुद्धको लडाइँमा साबुन पानीले मिचिमिची हात धुने बानी अत्यन्तै प्रभावकारी प्रमाणित भएको बताउनुभयो । कोरोना भाइरसका साथै अन्य सरुवा रोगबाट आफू तथा अन्यलाई जोगाउन यो नै सबैभन्दा सस्तो र प्रभावकारी उपाय भएको उहाँको भनाइ छ ।

कोरोना भाइरससँगै श्वासप्रश्वाससम्बन्धी रोग र निमोनिया लगायतबाट जोगिन साबुनमानीले मिचिमिचि हात धुनुपर्ने गौतमको सुझाव छ । 

हात कसरी धुने  ?

सकेसम्म साबुन पानीले मिचिमिची २० सेकेण्डसम्म हात धुनुपर्छ । हातमा धेरै नै फोहर भएको छ  भने ४० सेकेण्डसम्म नै धुनुपर्छ ।

साबुन पानी नभएको अवस्थामा भने पूरै हात भिज्ने गरी गुणस्तरीय स्यानिटाइजर दल्नुपर्छ । हात धेरै फोहर छैन, स्यानिटाइजर पनि छैन भने सफा पानीले मात्रै भए पनि हात धुन सकिने खानेपानी मन्त्रालयका सहसचिव रमाकान्त दुवाडीले बताउनुभयो । उहाँका अनुसार सफा पानीले मात्रै हात धुँदा पनि ८० प्रतिशत किटाणु नष्ट भएर जान्छ ।

यस्तै खरानी पानीले पनि मिचिमिची हात धोए किटाणु नष्ट हुने उहाँले बताउनुभयो । एक व्यक्तिले एक पटक हात धुँदा आधादेखि दुई लिटरसम्मको पानी प्रयोग गर्नु पर्ने खानेपानी मन्त्रालयका सहसचिव रमाकान्त दुवाडीले बताउनुभयो ।

कोरोना भाइरसको सङ्क्रमण सर्नुमा हात पहिलो माध्यम बन्ने भएकाले नाक, मुख छुनुअघि हातलाई सफा गर्नुपर्छ । यस्तै हात धोइसकेपछि पनि यसलाई तौलिया, हावामा सुकाएर वा पेपरले राम्ररी पुछेर सुख्खा बनाउन स्वास्थ्य मन्त्रालयका प्रवक्ता डाक्टर जागेश्वर गौतमको सुझाव छ । 

अन्तिम अपडेट: असोज १४, २०७७

तपाईको प्रतिक्रिया