काठमाण्डाै - नारायणगढ–मुग्लिङ सडक अझै खुलेको छैन । निरन्तर पहिरो खसेकाले बन्द सडक खुलाउन समस्या भएको चितवनका प्रमुख जिल्ला अधिकारी प्रेमलाल लामिछानेले बताउनुभयो ।

लगातारको पानीले पहिरो जाँदा चार–पाँच दिनयता सडक खुल्ने र लगत्तै बन्द हुने गरेको छ । निरन्तरको पानीले सडक खण्डको सेती दोभान, चारकिलो र पाँचकिलोमा ठूलो पहिरो खसेको छ । 

चितवनका प्रमुख जिल्ला अधिकारी प्रेमलाल लामिछानेका अनुसार अहिले पहिरो हटाउन चारवटा मेसिन र प्राविधिकहरु खटिएका छन् । दिउँसोसम्म पहिरो पन्छाएर सडक खुलाउने गरी प्रयास भइरहेको उहाँको भनाइ छ । 

जिल्ला ट्राफिक प्रहरी कार्यालय चितवनले अत्यावश्यक गाडीलाई वैकल्पिक बाटो प्रयोग गर्न अनुरोध गरेको छ । काठमाण्डौ आउने मुख्य सडक बन्द हुँदा दर्जनौँ गाडी र यात्रुबीच बाटोमै रोकिएका छन् । 

नारायणगढ–मुग्लिङ सडक खण्डसहित अहिले देशभरका १३ वटा सडक बन्द छन् । बन्द सडक र राजमार्ग खुलाउने प्रयास गरिरहेको सडक विभागले जनाएको छ ।