काठमाण्डाै - पहिरो हटाएर केहीबेर खुलाइएको नारायणगढ–मुग्लिङ सडक खण्ड फेरि बन्द भएको छ । बिहान केही बेर खुलेको सडक फेरि बन्द भएको प्रहरीले जनाएको छ । लगातारको वर्षाका कारण  पहिरो खसिरहेकाले सडक खुलाउन समस्या भएको जिल्ला प्रहरी कार्यालय चितवनका प्रहरी उपरीक्षक ओमप्रसाद अधिकारीले बताउनुभयो । 

सडक बन्द हुँदा नारायणगढ–मुग्लिङ सडक खण्ड हुँदै आवतजावत गर्ने गाडी बीच बाटोमै रोकिएका छन् भने गाडीको लामो लाम लागेको छ । यसैबीच, पूर्वपश्चिम राजमार्गको नारायणगढ-बुटवल सडक खण्ड पनि बन्द भएको छ।नवलपरासी बर्दघाट–सुस्तापूर्वको कावासोती थानाचोक नजिकै बाढीले राजमार्गको ह्युमपाइप बगाउँदा राजमार्ग बन्द भएको जिल्ला प्रहरी कार्यालयका प्रवक्ता प्रहरी नायब उपरीक्षक दिलीपकुमार गिरीले जानकारी दिनुभयो ।

सडकको ह्युमपाइप बगाएर बिहानदेखि अवरुद्ध भएको सडक सञ्चालनको तयारी भइरहेको छ । यस्तै, मध्यपहाडी लोकमार्ग र राप्ती राजमार्गको रुकुम पश्चिम सडक खण्ड बन्द भएको छ । पहिरोले जाँदा मध्यपहाडी लोकमार्गको मुसिकोट–चौरजहारी सडक खण्ड र राप्ती राजमार्गको मुसिकोट–सल्यान सडक खण्ड बन्द भएको हो । 

मध्यपहाडी लोकमार्ग रुकुम पश्चिम खण्डको सानीभेरी गाउँपालिकाको सुलिहाले लगायत पुर्तिमकाँडा, गिठाकोट, मुसिकोट नगरपालिकाको छिवांग लगायतका ठाउँमा पहिरो गएको छ । यसैबीच, अत्तरिया स्याले जोड्ने सुदूरपश्चिम प्रदेशको पहाडी जिल्लाको एक मात्र ठूलो भीमदत्त राजमार्ग पनि पहिरोका कारण बन्द भएको छ । 

अहिले देशभरका विभिन्न १२ वटा सडक खण्ड पनि पहिरोका कारण बन्द छन् । मनसुन सुरुभएयता १०६ वटा सडकमार्ग बन्द भएकामा ५८ ठाउँका सडक एकतर्फी सञ्चालनमा आएका छन् । पहिरोले बन्द भएका सडक खुलाउने प्रयास भइरहेको सडक विभागले जनाएको छ ।