पाँचथर – पाँचथरको फिदिम नगरपालिका ४ मा रहेकाे पर्यटकीय एवम् ऐतिहासिक स्थल सुम्हालुङ गढीको प्रवर्द्धनका लागि चासोक मेला सुरु भएको छ । यो क्षेत्र धार्मिक पर्यटनको दृष्टिकोणले महत्त्वपूर्ण मानिन्छ ।

हिजाे बुधवारदेखि सुरु भएको चासोक मेला यही पुस २३ गतेसम्म सञ्चालन हुने छ । पूर्वी नेपालमा बसोवार गर्ने लिम्बू जातिको महान् चाड चासोक तङ्नामको अवसरमा यहाँ बर्सेनि मेला लाग्ने गर्दछ ।

नेपाली भाषामा 'चासोक' को शाब्दिक अर्थ न्वागी र 'तङ्नाम' को अर्थ चाडपर्व भन्ने बुझिन्छ । यतिखेर लिम्बू समुदायले चासोक र तङ्नाम पनि मनाइरहेका छन् ।

सुम्हालुङ गढीको प्रवर्द्धनका लागि आयोजना गरिएको मेलामा सुम्हालुङ मिनी म्यारथन, केःलाङ् (च्याब्रुङ नाच), यालाङ् (धान नाच), पलुङ् लेप्मा (छेलो हान्ने) जस्ता मनोरञ्जन र खेलकुदका कार्यक्रमहरू आयोजना हुने आयोजक संस्था सुम्जिरि सुम्हात्लुङ आम्बेपज विकास प्रतिष्ठानका अध्यक्ष दिलबहादुर लावतीले जानकारी दिनुभयो । 

मेलामा विभिन्न जात–जातिको परम्परागत खानाका परिकारहरूको स्वाद तथा अवलोकन गर्न सकिनेछ । मेलामा पूर्वी पहाडका विभिन्न जिल्लाका साथै छिमेकी देश भारतको दार्जिलिङ र सिक्किमबाट पनि मानिसहरू आउने आयोजकले जनाएको छ ।

सुम्हालुङ गढी र लिम्बू समुदायको धार्मिक तथा सांस्कृतिक महत्त्व जोडिएको छ । तत्कालीन समयमा क्रुर शासकहरूविरुद्ध दश लिम्बूहरू यस क्षेत्रमा भेला भएर तीन वटा ढुङ्गाको चुलो गाढेको र कसम खाएर युद्ध सरु गरेको इतिहासमा पाइन्छ । त्यसपछि क्रुर शासकहरूविरुद्ध युद्ध लडेका दश लिम्बूहरू विजयी भएका भन्ने इतिहासमा पाइन्छ ।