‘क्यान इन्फोटेक’ मेला हुने

पुष २५, २०७५ बुधबार ११:१८:३४ | रासस

काठमाडाैं – सूचना, तथा सञ्चार प्रविधिको प्रयोगलाई प्रोत्साहन गर्ने उद्देश्यले आगामी माघ १५ देखि २० गतेसम्म ‘क्यान इन्फोटेक २०१९’ आयोजना हुने भएको छ ।

‘सुबिसु क्यान इन्फोटेक २०१९ इन एशोसिएशन विथ ई सेवा’ नाम दिइएको सूचना प्रविधिसम्बन्धी मेलाको कम्प्युटर एशोसिएशन नेपाल (क्यान) महासङ्घले आयोजना गर्न लागेको हो । भृकुटीमण्डपमा रहेकाे प्रदर्शनीस्थलमा ६ दिनसम्म सञ्चालन हुने मेलामा क्यान महासङ्घका सदस्य संस्थाका साथै विभिन्न स्वदेशी तथा विदेशी सूचना तथा सञ्चार प्रविधिसम्बन्धी कम्पनीको सहभागिता रहने मंगलबार आयोजित पत्रकार सम्मेलनमा जानकारी दिइयो ।

कूल १७५ स्टल रहने मेलामा हार्डवेयर सेल्स तथा मेन्टिनेन्स, पावर सोलुसन्स, मोबाइल एसेसोरिज, डिलर र डिस्ट्रिब्युटर्स, इन्टरनेट सेवाप्रदायक, टेलिकम्युनिकेसन्स, आइसिटी कलेज तथा तालीम प्रदायक संस्थाको सहभागिता रहनेछ ।

मेला अवलोकनका लागि सर्वसाधारणलाई प्रवेश शुल्क रु १०० र विद्यार्थीका लागि रु ५० तोकिएको छ । माघ १७ गते बिजनेस डेका दिन भने सबैले रु १०० शुल्क तिर्नुपर्नेछ । मेलालाई व्यवसायीले व्यापार विस्तारका साथै नयाँ प्रविधिको प्रदर्शनी गर्ने थलोका रुपमा उपयोग गर्नसक्ने महासङ्घका महासचिव रञ्जीतकुमार पोदारले बताउनुभयो । यसपटकको मेलामा शिक्षा, स्वास्थ्य, कृषि र पर्यटन क्षेत्रमा प्रयोग भएका नयाँ प्रविधिलाई समेत समावेश गरिनेछ ।

नयाँ सफ्टवेर, सुरक्षा उपकरण र नेपाली प्राविधिकले विकास गरेका प्रविधि पनि प्रदर्शनीमा राखिने आयोजकले जनाएको छ । हरेक तीन÷तीन घण्टामा चिट्ठामार्फत अवलोकनकर्तालाई उपहार प्रदान गरिनेछ । मेलामा एक जनालाई प्रत्येक दिन बम्पर पुरस्कार प्रदान गरिनेछ । नेपाललीले बनाएका दैनिक जीवनमा प्रयोग हुने रोबोट पनि प्रदर्शन गरिनेछ ।

‘नयाँ–नयाँ प्रविधिको अवलोकनसँगै जागिरको अवसर पनि’ नारासहित आयोजना हुने मेलामा सूचना प्रविधिको क्षेत्रमा करियर बनाउन प्राविधिक विषयमा अध्ययनरत विद्यार्थीले मेलास्थलमै व्यक्तिगत बिवरण बुझाउन सक्नेछन् । सो बिवरण महासङ्घले आइटी कम्पनीमा पठाई रोजगारीका लागि सहजीकरण गरिदिने छ । इन्फोटेकको २५औँ संस्करणको मुख्य प्रायोजक सुबिसु केबलनेट प्रा लि र एशोसिएट प्रायोजक ई सेवा रहेका छन् ।

प्रादेशिक इन्फोटेक

राजधानी काठमाडौँबाहिर प्रदेश नं १ को विराटनगरमा गत पुस १९ देखि २३ गतेसम्म इन्फोटेक मेला आयोजना गरेको महासङ्घले क्रमशः प्रदेश नं २ को वीरगञ्जमा यही पुस २७ देखि ३०, प्रदेश नं ३ को चितवनमा आगामी माघ २५ देखि २९ गतेसम्म मेला गर्ने जनाएको छ ।

त्यस्तै, गण्डकी प्रदेशको पोखरामा आगामी फागुन २४ देखि २८, प्रदेश नं ५ को बुटवलमा फागुन ३ देखि ७ र कर्णाली प्रदेशको सुर्खेतमा फागुन २४ देखि २८ गतेसम्म प्रादेशिक इन्फोटेक आयोजना गरिने आयोजकले जनाएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्