काठमाडौं – सरकार र २६ दिनदेखि अनसनरत डा. गोविन्द केसीपक्षबीच अहिले वार्ता भइरहेको छ । 

शिक्षा मन्त्रालयमा केही बेर अघिदेखि वार्ता सुरु भएको हो । मंगलबार दिउँसो केसी पक्ष र सरकारी वार्ता टोलीबीच वार्ता भएको थियो । मंगलबारको वार्ता दुवै पक्षले सकारात्मक भएको बताएका थिए । बुधबार सहमतिमा पुग्ने गरी वार्ता हुनसक्ने दुवै पक्षले बताएका छन् । 

वार्तामा डा. केसीका प्रतिनिधि र सरकारी वार्ताका टोलीका सदस्य सहभागी छन । डा. केसीको तर्फबाट जीवन क्षेत्री, सुरेन्द्र भण्डारी, ओमप्रकाश अर्याल, अभिषेकराज सिंह र सुमित पाण्डे सहभागी हुनुहुन्छ ।

वार्तामा विधेयकका केही बुँदा हटाएर संशोधन गरी डा।केसीका माग सम्बोधन गर्ने सरकारी वार्ता टोलीका सदस्यको भनाई छ । शिक्षासचिव खगराज बराल नेतृत्वको सरकारी वार्ता टोलीले यसअघि तीन पटकसम्म डा. केसी पक्षसँग छलफल गरे पनि सहमति हुन सकेको थिएन ।