'चाडपर्व घरमै मनाउनुस्, अरुलाई नबाेलाउनुस्'

 साउन २७, २०७७ मंगलबार १७:५५:१८ | उज्यालो सहकर्मी
unn.prixa.net

फाइल फाेटाे

काठमाण्डौ – सरकारले चाडपर्वमा परिवारका सदस्यबाहेक अरु जमघट नगर्न निर्देशन दिएको छ । धार्मिक स्थलहरु नित्य पूजाको लागि मात्रै खोल्ने र भक्तजनको प्रवेश निषेध गर्न सरकारले निर्देशन दिएको छ ।

चाडपर्वमा पनि परिवारका सदस्य बाहेक अरुको जमघट नगर्न मन्त्रिपरिषद्को बैठकले निर्देशन दिएको हो । गएको २२ गते स्वास्थ्य मन्त्रालयले चाड पर्व सुरु हुन लागेको भन्दै चाडपर्व र उत्सवसम्बन्धी मापदण्ड ल्याएको थियो । मन्त्रालयले सबै किसिमका चाडपर्व, जात्रा तथा उत्सव मनाउँदा एउटै घरमा बसोबास गर्ने परिवारका व्यक्तिबाहेक अन्यसँग भेटघाट कम गर्ने र भेटघाट गर्ने परेमा कम्तीमा दुई मिटरको दुरी कायम गर्न भनेको छ ।

यस्तै सकेसम्म घरबाहिरको भेटघाटमा नजाने र जानै परेमा सहभागी हुँदा मास्क अनिवार्य लगाउने, कार्यक्रम स्थलमा प्रवेश गर्दा अनिवार्य साबुन पानीले हात धुने वा स्यानिटाइजर प्रयोग गर्न मन्त्रालयले आग्रह गरेको छ ।

यस्तै धार्मिकस्थलमा हुने हरेक भेला कार्यक्रममा बढीमा २५ जना मात्रै भेला हुने, टाढैबाट नमस्कार गर्ने, रेलिङ, देवी देवताका मूर्तिहरु र धेरै व्यक्तिले प्रयोगमा ल्याउन सक्ने सामग्री नछुन पनि मन्त्रालयले सचेत गराएको छ ।

खोक्दा वा हाच्छिउँ गर्दा रुमाल वा टिस्यु पेपरले मुख छोप्न, सम्भव नभए कुहिनो दाेब्र्याएरमुख छोप्ने गर्नुपर्छ । सार्वजनिक ठाउँमा जथाभाबी नथुक्न र ज्वरो, रुघाखोकी, श्वासप्रश्वासमा समस्या भएकाहरुलाई कार्यक्रममा भेला नहुन स्वास्थ्य मन्त्रालयको मापदण्डमा उल्लेख छ ।

अन्तिम अपडेट: भदौ १, २०७७

तपाईको प्रतिक्रिया