आज रातिदेखि पानी पर्ने क्रम बिस्तारै बढ्ने : मौसमविद्

 साउन ३०, २०७७ शुक्रबार ७:४५:८ | उज्यालो सहकर्मी
unn.prixa.net

काठमाण्डौ - आज रातिदेखि पानी पर्ने क्रम बिस्तारै बढ्ने मौसमविद्ले बताएका छन् ।

मनसुनी न्यूनचापीय रेखा नेपाल नजिकै आउन लागेकाले रातिदेखि पानी पर्ने क्रम बिस्तारै बढ्ने मौसम पूर्वानुमान महाशाखाले जनाएको छ । तर पानी पर्दा नजिकै ठूलो पानी परे पनि नजिकै अर्को ठाउँमा पानी नपर्न पनि सक्ने महाशाखाका मौसमविद् मिनकुमार अर्यालले बताउनुभयो ।

उहाँका अनुसार अहिले देशका केही ठाउँको मौसम खुलेको भए पनि प्रदेश १, वाग्मती प्रदेश ,गण्डकी प्रदेश, कर्णाली प्रदेश र सुदूरपश्चिम प्रदेशका केही ठाउँमा पानी परिरहेको छ । अहिले खुलेको ठाउँको मौसम पनि बिस्तारै बादल लागेर केही ठाउँमा हल्कादेखि मध्यम खालको पानी पर्ने सम्भावना रहेको उहाँले बताउनुभयो ।

वाग्मती प्रदेश, गण्डकी प्रदेश, प्रदेश ५ र कर्णाली प्रदेशका एक/दुई ठाउँमा ठूलो पानी पनि पर्ने सम्भावना रहेको उहाँको भनाइ छ । यस्तै राति प्रदेश १, वाग्मती प्रदेश, प्रदेश ५, कर्णाली प्रदेश र सुदूरपश्चिम प्रदेशका एक/दुई ठाउँमा ठूलो पानी पर्ने पूर्वानुमान गरिएको मौसमविद् अर्यालले बताउनुभयो । 

उहाँका अनुसार आजको भन्दा भोलि देशका धेरै ठाउँमा पानी पर्ने संभावना छ । केही दिनयता कम पानी पर्दा गर्मी भने बढेको छ । काठमाण्डौमा हिजोको तापक्रम ३१ डिग्री सेल्सियस पुगेको महाशाखाले जनाएको छ । अस्ति २९ दशमलव २ डिग्री सेल्सियस मापन गरिएको काठमाण्डौको तापक्रम हिजो दुई डिग्रीले बढेको हो । यसैबीच कास्कीको लुम्ले ठूलो पानी परेको र अझै पानी परिरहेकाले एक्कासी बाढी आउन सक्ने बाढी पूर्वानुमान महाशाखाले जनाएको छ । 

महाशाखाले कमजोर र भिरालो जमिन आसपास पहिरोको जोखिम रहेकाले बिहान १० बजेसम्म नै सावधानी अपनाउन आग्रह पनि गरेको छ । यसैगरी आज बर्दिया, कैलाली, कन्चनपुरका केही ठाउँमा राति ठूलो पानी परेको र अझै पानी पर्ने भएकाले कान्द्रा, मोहना, खुटिया, सुहेली, चौधरा र साना खोलामा एक्कासी बाढी आएर होचा ठाउँमा डुबान हुनसक्ने भएकाले सतर्क हुन महाशाखाले अनुरोध गरेको छ ।

अन्तिम अपडेट: भदौ २३, २०७७

तपाईको प्रतिक्रिया