काठमाण्डाै – नेपाल कम्युनिस्ट पार्टी (नेकपा) को ओली समूहका नेता आनन्दप्रसाद पोखरेलले प्रतिनिधि सभा पुनर्स्थापनाबाट देश फेरि अस्थिरतातर्फ जाने दाबी गर्नुभएको छ ।

उज्यालोसँग कुरा गर्दै नेता पोखरेलले अब फेरि विगतको जस्तो दलभित्र, संसदभित्र अस्थिरता पैदा हुने बताउनुभयो । उहाँले प्रतिनिधि सभा पुनर्स्थापनाबाट नागरिक मत लिने बाटो पनि छेकिएको भन्दै यसले स्थिरता नदिने बताउनुभयो ।

उहाँले आफूहरू संविधान मान्ने, न्यायालय स्वतन्त्र हुनुपर्ने, संविधानको सर्वाेच्चता मान्ने पार्टी भएकाले अदालतको निर्णयप्रति सकारात्मक र नकारात्मक टिप्पणी नगर्ने बताउनुभयो ।

नेता पोखरेलले अब प्रधानमन्त्रीले संसदीय प्रक्रियाहरू पूरा गरेर स्वाधिनताको पक्षमा र आत्मसमर्पणवादको विरुद्धमा लडाइँ जारी राख्ने बताउनुभयो । 

गएकाे पुस ५ गते भएको प्रतिनिधि सभा विघटनको निर्णय असंवैधानिक भएको भन्दै सर्वोच्च अदालतमा १३ वटा रिट परेका थिए । रिटको सुनुवाइको लागि संवैधानिक इजलास गठन भएको थियो । संवैधानिक इजलासमा प्रधानन्यायाधीश चोलेन्द्रशम्शेर जबरा, न्यायाधीशहरू विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी रहेका थिए ।   

यसैगरी सर्वाेच्चकाे आदेशमा आदेशमा १३ दिनभित्रै संसद् बैठक बोलाउन भनिएको छ ।