काठमाण्डौ – नेपाली कांग्रेसका नेता रमेश लेखकले सरकारको नेतृत्व लिन पार्टी तयार रहेको बताएको छ । पार्टी कार्यालय सानेपामा सोमवार बसेको पदाधिकारी र पूर्वपदाधिकारीको बैठकपछि उहाँले आवश्यक परे सरकारको नेतृत्व गर्न पार्टी तयार रहेको बताउनुभएको हो ।

उहाँले भन्नुभयो, ‘आवश्यकता पर्‍यो भने वैकल्पिक सरकार दिन्छौँ भनेकै छाैँ तर अझै परिस्थिति सुनिश्चित र परिपक्क भएको छैन ।’ 

बैठकमा क्रियाशील सदस्यता छानबिन समितिले क्रियाशील सदस्यताको व्यवस्थापनको सम्बन्धमा भएको प्रगति, कमी कमजोरी लगायतबारे जानकारी गराएको थियो । क्रियाशील सदस्यता सुरु नै नभएका सप्तरी, सिरहा, धनुषा, रसुवा, बारा, बर्दिया, बाँके, रुकुम पूर्व र डोल्पाका सम्बन्धमा कसरी अगाडि बढ्ने बारेमा बैठकमा छलफल भएको नेता लेखकले बताउनुभयो ।  

सोमवारसम्म तीन लाख ९२ हजार सात सय ९४ जनाले क्रियाशील सदस्यताको सम्पूर्ण जानकारी इन्ट्री भइसकेको र त्यसमध्ये नयाँ एक लाख ८० हजार दुई सय ७५ जना र नवीकरण भएकोमा दुई लाख १२ हजार पाँच सय १९ जना रहेको उहाँले जानकारी दिनुभयो । 

लेखकका अनुसार देशभर १० लाख क्रियाशील सदस्य रहेको अनुमान कांग्रेसले गरेको छ । कांग्रेसले महाधिवेशनको पूर्वसन्ध्यामा नवीकरण र नयाँ वितरणका लागि भोलि (मङ्गलवार) सम्मको समय दिएको थियो ।