दार्चुला – दार्चुलामा लगातारको वर्षापछि आएको बाढी र पहिरोका कारण चार जना सम्पर्कविहीन भएका छन् भने एक जना घाइते भएका छन् ।

दार्चुलाको नौगाड गाउँपालिकामा पहिरो गएको र महाकाली नगरपालिकामा आएको बाढीका कारण चार जना सम्पर्कविहीन भएका र एक जना घाइते भएका दार्चुलाका सहायक प्रमुख जिल्ला अधिकारी हेमती साउदले जानकारी दिनुभयो । घाइते एक जनाको उपचार भइरहेको छ । बाढीले अहिलेसम्म ११ वटा घर बगाएको उहाँले बताउनुभयो । अहिले सम्पर्कविहीन भएकाको खोजी र उद्धारको काम भइरहेको उहाँले बताउनुभयो ।

यस्तै बाढीले खलङ्गाको दशरथनगर आधारभूत विद्यालय बगाएको छ । दुहुँ र महाकाली जोड्ने लास्कु झोलुङ्गे पुल र मोटरबेल पुल लास्कु खोलाले बगाएको छ । बाढी, पहिराेका कारण दार्चुला–तिङ्कर सडक पनि बन्द भएको छ । दार्चुला–तिङ्कर सडकमा पार्किङमा राखिएका चार वटा जीप महाकाली नदीले बगाएको छ । बाढीले महाकाली नदी नियन्त्रण आयोजनाले निर्माण गरेको पक्की तटबन्धमा क्षति पुगेकाे छ ।