नुवाकोट जिल्ला प्रशासन कार्यालयमा राहदानी र राष्ट्रिय परिचयपत्र बनाउनेको अनलाइन आवेदन निःशुल्क भरिदिने

वैशाख २६, २०८० मंगलबार १५:५८:१६

नुवाकोट – नुवाकोटको विदुर नगरपालिकाले राहदानी र राष्ट्रिय परिचयपत्रको अनलाइन आवेदन फारम निःशुल्क भरिदिने भएको छ ।

आउँदो जेठ १ गतेदेखि जिल्ला प्रशासन कार्यालय नुवाकोटमा राहदानी र राष्ट्रिय परिचयपत्र बनाउन आउनेहरूको अनलाइन आवेदन फारम निःशुल्क भरिदिने नगरपालिकाले जनाएको छ ।

सोमबार नुवाकोटका प्रमुख जिल्ला अधिकारी किरण थापा र बिदुर नगरपालिकाका मेयर राजन श्रेष्ठसहितको सरोकारवालाबीच भएको छलफलमा यस्तो निर्णय भएको हो ।

जिल्ला प्रशासन परिसरमै नगरपालिकामार्फत सञ्चालित आप्रवासी स्रोत केन्द्रको सहायता कक्षबाट निःशुल्क फारम भर्ने कर्मचारी खटाउने मेयर श्रेष्ठले जानकारी दिनुभयो ।

उहाँका अनुसार राहदानी र राष्ट्रिय परिचयपत्रको अनलाइन आवेदन फारम भर्नका लागि नगरपालिकाले दुई जना कर्मचारी र आवश्यक उपकरणको व्यवस्था गर्ने छ ।

पछिल्लो समय सरकारले राहदानी र राष्ट्रिय परिचयपत्रको आवेदन अनलाइनमार्फत दिनु पर्ने नियम बनाएको छ ।

जिल्ला प्रशासन कार्यालयले नुवाकोटमा विभिन्न व्यक्ति र व्यवसायीले राहदानीको फारक भरिदिए बापत तीन सय र राष्ट्रिय परिचयपत्रको फारम भरिदिँदा एक सय रुपैयाँ शुल्क लिन पाउने नियम लागू गरेको थियो । तर अब आउने जेठदेखि भने नागरिकले निःशुल्क सेवा लिन पाउने भएका छन् ।

‘अनलाइन आवेदन फारम भर्ने क्रममा निजी तथा व्यावसायिक सेवा प्रदायकहरूले पाँच हजारसम्म रुपैयाँ लिने गरेको गुनासो आएसँगै शुल्क निर्धारण गरेका थियौँ’, प्रमुख जिल्ला अधिकारी थापाले भन्नुभयो ‘विदुरले निःशुल्क सेवा उपलब्ध गराउन तयार भएसँगै सेवाग्राहीलाई सहज हुनुका साथै आर्थिक भारको समस्यासमेत हट्ने विश्वास छ ।’

प्रशासन कार्यालयका अनुसार राहदानी बनाउन आवेदन फाराम भरेपछि पालो आउन करिब तीन हप्ता लाग्ने गरेको छ । राहदानी र राष्ट्रिय परिचयपत्रको अनलाइन आवेदन दिने सेवाग्राही दैनिक दुई सयभन्दा बढी भएको प्रशासनको तथ्याङ्क छ ।

अन्तिम अपडेट: पुस ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्