धादिङको किराञ्चोकमा लोभीपापी गरुड

भदौ २०, २०७६ शुक्रबार १०:१८:५३ | रासस

धादिङ – धादिङको गजुरी गाउँपालिकाको किराञ्चोकमा भेटिएको विश्वमै दुर्लभ र लोपोन्मुख अवस्थामा पुगेको लोभीपापी गरुड (गाउँमा यसलाई हिलेगिद्ध र केही ठाउँमा भुँडीफोरको नामले चिनिन्छ) संरक्षणमा गाउँपालिकाले लगानी गर्ने भएको छ ।

गजुरी गाउँपालिकाका अध्यक्ष राजेन्द्रविक्रम बस्नेतले संसारबाटै हराउन लागेको दुर्लभ चरा गाउँमा हुनुलाई गाउँपालिकाको गौरवको रूपमा लिएर यसको संरक्षण गर्न लगानी गर्ने र गाउँवासी र विद्यार्थीहरुलाई सचेत बनाउने अभियान शुरु गरिएको बताउनुभयो ।

गाउँपालिकाका अध्यक्ष र चरा संरक्षणविद्को टोली गाउँमै पुगेर यो चराको संरक्षण गर्न अभियानको थालनी गर्दै पर्चा वितरण, होर्डिङबोर्डहरुको स्थापना र समुदाय र किराञ्चोक माविका विद्यार्थीहरुसँग प्रत्यक्ष अन्तरक्रिया गरिएको छ ।

लोभीपापी गरुड करम, आँप, सल्ला र सिमलको ठूलो बोटमा बासस्थान बनाएर लामो समयदेखि बसेको भए पनि संरक्षणको अभावमा हराउँदै गएको थियो । केही वर्ष अघिसम्म गाउँमा ठूलो बथान भएको भए पनि केही मानिसले मारेर खाने, मलसाँप्रो लगायतको अन्य जीव जनावरले आक्रमण गर्ने, बालीनालीमा विषादीको प्रयोग गर्ने लगायतका कारणले यो हराउँदै गएको संरक्षणविद् कृष्णप्रसाद भुसालले गाउँवासीलाई जानाकारी दिनुभयो ।

धादिङका सञ्चारकर्मीहरुले केही दिनअघि यो पक्षी देखेपछि फोटो खिचेर चरा विज्ञलाई पठाइएका थिए । चरा विज्ञहरुको अनुसन्धानपछि यो पक्षी संरक्षणको सूचीमा रहेको बताएपछि संरक्षणकर्मीहरु नै गाउँ पुगेका हुन् । गाउँपालिकाको वडा नं ७ र ८ मा यो चराको गुँड रहेको छ ।

मानिसहरुको नजिकै रहने, खेतबारीको सर्प, भ्यागुता, गँगटो आदि आहारा खाएर किसानहरुलाई खेतमा यसले गरे पनि संरक्षण चेतनाको अभावमा हालसम्म जानकारी नभएर बेवास्ता भएको भन्दै किराञ्चोक माविका शिक्षक देवराज ओझाले अब यसको संरक्षणमा लाग्ने र विद्यार्थीहरुलाई समेत परिचालन गर्ने बताउनुभयो ।

नेपालमा पाइने आठ प्रजातिका गरुडमध्ये सेतो घाँटी भएको, चुच्चो रातो भएको, अलि होचो कदको चरा नै लोभीपापी गरुड हो । अहिलेसम्म धादिङको किरञ्चोकमा र कुम्पुर क्षेत्रमा यसको गुँड तथा बासस्थान फेला परेको छ । धादिङको किराञ्चोक क्षेत्रमा केही वर्षअघि धेरै सङ्ख्यामा यो चरा भेटिएको भए पनि पशुमा लगाइने डाइक्लोफेनिक नामक औषधिको प्रयोग, चोरी सिकारी, बासस्थान तथा आहाराको कमीले हालका दिनहरुमा हराउँदै गएको र विश्वमै दुर्लभ चरा भएकोले यसलाई संरक्षण गर्न सबै लाग्नुपर्ने लोभीपापी चराविज्ञ प्रशान्त घिमिरेले बताउनुभयो ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्