काठमाण्डौ – काठमाण्डौ उपत्यकामा आइतबार ३१ जनामा कोरोना भाइरसको सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार काठमाण्डौमा २२, ललितपुरमा आठ र भक्तपुरमा एक जनामा कोरोनाको सङ्क्रमण पुष्टि भएको हो ।

मन्त्रालयका अनुसार रौतहट र कैलाली जिल्लामा पाँच हजारभन्दा बढी व्यक्तिमा कोरोना सङ्क्रमण देखिएको छ भने भोजपुर, सङ्खुवासभा, रसुवा, मनाङ र मुस्ताङ गरी पाँच वटा जिल्ला कोरोना सङ्क्रमण शून्य रहेको छ ।

देशभर आइतबार दुई सय ४६ जनामा कोभिड–१९ को सङ्क्रमण पुष्टि भएको छ । योसँगै सक्रिय सङ्क्रमितको सङ्ख्या पाँच हजार ६ सय ७२ पुगेको छ । मन्त्रालयका प्रवक्ता डाक्टर जागेश्वर गौतमका अनुसार कोभिड–१९ बाट सङ्क्रमण मुक्त भइ पछिल्लो २४ घण्टामा एक सय ११ जना डिस्चार्ज भएका छन् । योसँगै अहिलेसम्म १४ हजार ६ सय तीन जना सङ्क्रमित निको भएर घर फर्किएका छन् ।

मन्त्रालयका अनुसार सङ्क्रमितमध्ये ७२ प्रतिशत निको भएका छन् भने मृत्यु हुनेमा शून्य दशमलव २८ प्रतिशत रहेको छ ।