आईसीयू र भेन्टिलेटरको अभाव हुन सक्ने भन्दै सरकार चिन्तित, यस्तो छ अहिलेको अवस्था

 साउन २३, २०७७ शुक्रबार १७:५१:३ | उज्यालो सहकर्मी
unn.prixa.net

काठमाण्डौ – सरकारले पछिल्लो समय कोरोना सङ्क्रमणको कारण हुने मृत्युदर बढ्न थालेको र सङ्क्रमितमा गम्भीर लक्षण देखिन थालेको जनाएको छ । अहिले नेपालमा कोरोनाका कारण हुने मृत्युदर शून्य दशमलव ३ प्रतिशत रहेको तर यो बढ्ने क्रममा भएकाले चिन्तित बनाएको मन्त्रालयले जनाएको छ । 

नेपालमा कोरोना भाइरस सङ्क्रमणको कारण अहिलेसम्म ७० जनाको मृत्य भइसकेको छ । ६६ जना सङ्क्रमित सघन उपचार कक्ष (आईसीयू) मा छन् भने तीन जना भेन्टिलेटरमा रहेका छन् । 

सङ्क्रमणको पहिलो चरणमा विदेशबाट आउनेहरुमा सङ्क्रमण देखिएकोमा अहिले लकडाउनको पालना नगरेका कारण स्थानीय व्यक्तिमा समेत सङ्क्रमण देखिन थालेको मन्त्रालयले जनाएको छ । 

यस्तै सरकारले पछिल्लो समय धेरै सङ्क्रमितमा गम्भीर लक्षण देखिन थालेकोले उपचारको लागि आईसीयू बेड र भेन्टिलेटरको अभाव हुन सक्ने भएकाले निकै सतर्क रहन सर्वसाधारणलाई अनुरोध गरेको छ । स्वास्थ्य मन्त्रालयका प्रवक्ता डाक्टर जागेश्वर गौतमले  काठमाण्डौ जस्ता घनाबस्ती भएका ठाउँमा कोरोना फैलिँदा अस्पताल र बेडको अभाव हुन सक्ने भएकाले कोरोनाबाट बच्न नागरिकलाई आग्रह गर्नुभयो । 

अहिले देशभर २६ सय आईसीयू र नौ सय भेन्टिलेटर रहेका छन् । कोरोनाको उपचारको लागि दुई सय ५० आईसीयू बेड र भेन्टिलेटर थपिएको उहाँले जानकारी दिनुभयो । दुई सय बेड थप्न प्रक्रिया अघि बढाइएको छ । 

गम्भीर बिरामीको उपचारको लागि आईसीयू र भेन्टिलेटर आवश्यक पर्ने भएकाले लक्षण नभएका, सामान्य लक्षण भएका सङ्क्रमित घरकै आइसोलेसनमा बस्न सक्ने मन्त्रालयले जनाएको छ । 

हब अस्पताल र अन्य गरेर ३६ वटा अस्पतालमा कोरोनाका सङ्क्रमितको उपचार भइरहेको र एक सय २५ वटा कोभिड क्लिनिक बनाइएको मन्त्रालयले जनाएको छ ।  

अन्तिम अपडेट: साउन २६, २०७७

तपाईको प्रतिक्रिया