जुनसुकै सामग्री प्रयोग गरेर बनाइने संरचनालाई भूकम्प प्रतिरोधी बनाउन सकिने

 साउन २३, २०७७ शुक्रबार १९:५४:५८ | उज्यालो सहकर्मी
unn.prixa.net

काठमाण्डाै – सबै खालका भवनलाई भूकम्प प्रतिरोधी र सुरक्षित बनाउन सकिने भएको छ । राष्ट्रिय पुनर्निर्माण प्राधिकरणले बनाएको भवन संहिता अध्यावधिक भएसँगै साना/ठूला सबै खालका भवनलाई भूकम्प प्रतिरोधी बनाउन आवश्यक पर्ने संरचनागत डिजाइनसहितको मापदण्डको पनि टुङ्गो लागेको छ ।

विभिन्न देशमा प्रचलित भवन संहिता  एवं  यस नयाँ अनुसन्धान, प्रविधि र ज्ञानको विकासका आधारमा भूकम्प प्रतिरोधी सुरक्षित भवन निर्माण गर्न भवन संहिता अध्यावधिक गरिएको शहरी विकास मन्त्रालयले जनाएको छ ।

राष्ट्रिय पुनर्निर्माण प्राधिकरण केन्द्रीय आयोजना कार्यान्वयन इकाइका स्ट्रक्चरल इन्जिनियर विपिनकुमार गौतमका अनुसार अध्यावधिक संहितामा नेपाललगायत यस क्षेत्र वरिपरिकाे भूकम्पीय जोखिम विश्लेषण गरी त्यसका आधारमा भूकम्पीय जोखिम जोनिङ नक्शा तयार गरी र ठाउँअनुसारको फरक–फरक मानक राखिएको छ । यो संहिता प्रयोग गरी जस्तोसुकै प्रविधि र सामग्री प्रयोग गरी बनाइने संरचनाहरुलाई भूकम्प प्रतिरोधी बनाउन सकिनेछ ।

अध्यावधिक संहिताको अनुसूचीमा स्टिल र ढलानवाला घरलाई भूकम्प प्रतिरोधी बनाउनका लागि चाहिने विस्तृत विवरण समावेश गरिएको छ । विज्ञहरुले अध्यावधिक गरिएको राष्ट्रिय भवन संहिताले नेपालमा सबै खालका संरचनालाई भूकम्प प्रतिरोधी बनाउने गरी डिजाइन गर्न सम्भव हुने बताएका छन् ।

राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले नयाँ भवन संहिताबाट भूकम्प प्रतिरोधी संरचनाहरुको निर्माण गर्न र सुरक्षित नेपालको अभियानलाई साकार पार्न महत्त्वपूर्ण सहयोग पुग्ने विश्वास व्यक्त गर्नुभयो । 

अन्तिम अपडेट: साउन २७, २०७७

तपाईको प्रतिक्रिया