काठमाण्डौ – आज मङ्सिर ४ गते अर्थात् आम चुनाव । सुरक्षित र शान्तिपूर्ण रूपमा मतदान गराउन बिहानैदेखि देशभरको सुरक्षा व्यवस्था कडा पारिएको छ ।

देशका धेरै ठाउँमा बिहानैदेखि सुरक्षाकर्मी खटिएका छन् । चोक चोकमा खटिएका प्रहरीले सुरक्षा जाँचमा कडाइ गरिरहेका छन्  । सुरक्षा व्यवस्थापन गरेकाले ढुक्क भएर मतदान केन्द्रसम्म पुग्न र कसैको दबाबमा नपरी भोट हाल्न गृह मन्त्रालयले आग्रह गरेको छ ।

गृह मन्त्रालयका प्रवक्ता फणीन्द्रमणि  पोखरेलले सुरक्षाको सबै व्यवस्थापन भएकाले ढुक्क हुन आग्रह गर्नु भएको छ । उहाँका अनुसार सुरक्षाका लागि तीनै घेरामा सुरक्षाकर्मी खटिसकेका छन्  । यस अघिका चुनावमा केही ठाउँमा बुथ क्याप्चर र धाँधलीका घटना भएकाले  यसपालि त्यस्तो हुन नदिन कडाइका साथ तयारी थालिएको उहाँले बताउनुभयो ।

२०६४ सालदेखि भएका घटना, अस्वाभाविक मतदान भएका आधारमा १० भन्दा बढी जिल्लाका केही मतदान केन्द्रलाई विशेष संवेदनशील सूचीमा राखेर हवाई गस्तीसमेत थालिएको गृह प्रवक्ता पोखरेले बताउनुभयो ।

यस अघिका चुनावमा झडप हुने तथा बुथ कब्जाको प्रयास हुने गरेका ठाउँमा थप मद्दतका लागि विशेष प्रहरी टोली खटिएका छन् । दोलखा, बाजुरा, कैलालीलगायत जिल्लामा यस्तो टोली खटाइएको गृह मन्त्रालयले जनाएको छ ।

यस्ता ठाउँलाई उच्च संवेदनशील सूचीमा राखेर विशेष सुरक्षा व्यवस्था अपनाइएको छ  । अति संवेदनशील ठाउँमा सेनाले हवाई गस्ती गर्नेछ । गृह मन्त्रालयका प्रवक्ता फणीन्द्रमणि पोखरेलले १० हजार ८ सय ९२ मतदान केन्द्रमै पूर्ण सुरक्षाको व्यवस्था मिलाइएको बताउनु भएको छ । 

उहाँले मतदान स्थलमा वा भोट हाल्न जाँदै गर्दा केही समस्या परे पैसा नलाग्ने प्रहरीको १०० नम्बरमा फोन गरेर जानकारी गराउन समेत आग्रह गर्नु भएको छ । चुनावमा नेपाल प्रहरी, सशस्त्र प्रहरी, नेपाली सेना, राष्ट्रिय अनुसन्धान विभाग र म्यादी प्रहरी गरी दुई लाख ९८ हजार पाँच सय ७९ सुरक्षाकर्मी खटिएका छन् ।

चुनावको पहिलो घेरामा नेपाल प्रहरी र म्यादी हुनेछन् भने बाहिरी घेरामा सेना र सशस्त्र प्रहरी खटिएका छन् ।