काठमाण्डाै – काठमाण्डाै महानगरपालिकाका मेयर बालेन्द्र शाहले अभियन्ता ‘ई’ ले उठाएका माग पूरा गर्न काठमाण्डौ महानगरसँग कानुनी आधार नभएको बताउनुभएको छ । अभियन्ता ‘ई’ लाई सम्बाेधन गर्दै सामाजिक सञ्जालमा स्टासट लेखेर मेयर शाहले अहिलेको कानुनी व्यवस्थाहरूले ‘ई’ का माग पूरा गर्न नसक्ने प्रस्टीकरण दिनुभएको हो ।

‘ई’ ले उठाएका मागहरूलाई आफूले नपन्छाउने भन्दै शाहले फुटपाथ वा बाटोमा व्यापार गर्नु गैरकानुनी भएको बताउनुभएको छ । यस्तै समय छुट्याएर व्यापार गर्न दिँदा पनि त्यो समयमा बाटो अवरोध हुने भन्दै उहाँले त्यसो गर्न पनि नसकिने बताउनुभएको छ ।

फुटपाथ बाहेक सार्वजनिक जग्गामा व्यापार गर्न दिने कुरा अहिलेको कानुनले मेयर मात्र नभई मन्त्रिपरिषद्ले पनि गर्न नसक्ने मेयर शाहकाे दाबी छ ।

यस्तै मेयर शाहले ‘ई’ को जायज माग पूरा गर्नुपर्छ भन्दै ऐक्यबद्धता जनाउने नेताहरूलाई पनि सतही कुरा गरेर राजनीति नगर्न आग्रह गर्नुभएको छ । केपी ओली, बाबुराम भट्टराई, गगन थापा, कमल थापा, स्वर्णिम वाग्ले लगायतलाई सम्बोधन गर्दै उहाँले जायज माग पूरा गर्ने सतही कुरा गर्नुभन्दा स्पष्ट कानुन बनाउन आग्रह गर्नुभएको छ ।