‘साउदीमा कमाएर घरको ऋण तिर्छु भन्नुहुन्थ्यो, गएको एक वर्षपछि आफैँ हराउनुभयो’

 जेठ २३, २०८० मंगलबार १६:१४:१०
unn.prixa.net

मेरो नाम कुमारी बिक हो । घर खोटाङको दिक्तेल रुपाकोट मझुवागढी नगरपालिका १४ बुइपा हो । मेरा श्रीमान् शुक्र विश्वकर्मा २०७३ सालमा रोजगारीको सिलसिलामा साउदी अरेबिया जानुभएको थियो ।

उहाँ विदेश जानुको एउटै उद्देश्य घर बनाउँदा लागेको ऋण तिर्नु थियो । घर सल्लाहमा नै विदेश जानुभएको थियो । तर खै के भयो भयो गएको एक वर्षपछि त फोन नै आउन छाड्यो । उहाँको काम र कमाइ राम्रो नै थियो ।

तर एक दिन ‘अबदेखि मैले कम्पनी छाडेँ अब म केही गर्न सक्दिन’ भन्नुभयो । म नेपाल फर्कन पनि सक्दिन भन्नुभएको थियो । त्यस दिनदेखि के भयो कुन्नी न फोन आयो न त आजका दिनसम्म मान्छे नै आउनुभयो ।

उहाँ सम्पर्कविहीन भएपछि साहुहरूले घर घेर्न थाले । कि त घर छाड् कि त पैसा तिर भनेपछि मैले घर नै छाडिदिएँ । 

घर बनाउँदा र उहाँ विदेश जाँदा गरी १० लाख रुपैयाँ ऋण लागेको छ । एक मनमा श्रीमानको चिन्ता छ त अर्को मनमा ऋणको । तर उहाँको खबर मात्र पाउन पाए पनि जसोतसो ऋणको व्यवस्थापन गर्नुहुन्थ्यो भन्ने मनमा लाग्छ ।

घरमा दुई छोरा र एक छोरी छन् । बुवाकै पिरले उनीहरू पनि डुबेका छन् । बुवा कहिले आउँछन् भनेर बाटो हेरिरहन्छन् । ऋण तिर्न नसकेर भएको घर पनि साहुले लिएका छन् । मेला मजदुरी गरेर मैले चार जनाको ज्यान पालेर बसेकी छु । 

उहाँ साउदीमा हुनुहुन्छ भने जसरी पनि घर आउनुहोस् । पैसा चाहिँदैन । तपाईँ भए बाँकी समस्या त जसोतसो समाधान गरौँला । 

(प्रस्तुति : लीला निरौला । उहाँ आप्रवासी स्रोत केन्द्र खोटाङमा परामर्शकर्ता हुनुहुन्छ ।​)

अन्तिम अपडेट: असार ५, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया