काठमाण्डाै – आठौँ प्रधानमन्त्री कप एनभीए भलिबल लिगमा आज भएका खेलमा महिलातर्फ न्यु डायमन्ड क्लब र एभरेस्ट क्लब विजयी भएका छन् ।

त्रिपुरेश्वरमा रहेको राष्ट्रिय खेलकुद परिषद् (राखेप) को कभर्ड हलमा भएको पहिलो खेलमा न्यु डायमन्डले पहिलो जित हात पार्ने क्रममा कर्णाली प्रदेशलाई ३–० को सोझो सेटमा हरायो । यस्तै एभरेस्टले सशस्त्र प्रहरी बलको एपीएफ क्लबलाई ३–२ को सेटमा हरायो ।

यस्तै पुरुषतर्फ एपीएफ क्लब, हेल्प नेपाल विजयी भएका छन् । एपीएफले कोशी प्रदेशलाई ३–१ र हेल्प नेपालले नेपाल पुलिस क्लबलाई ३–० को सेटमा हरायो । पुरुषतर्फ नै अहिले गण्डकी प्रदेश र त्रिभुवन आर्मी क्लब खेलिरहेका छन् । यो खेल सकिएपछि सुदूरपश्चिम प्रदेश र बूढानीलकण्ठ भलिबल क्लब खेल्नेछन् ।

प्रतियोगितामा पुरुषतर्फ आठ र महिलातर्फ छ वटा टोली रहेका छन् । लिग चरणपछि पुरुष र महिला दुवैतर्फ शीर्ष दुई टोलीबीच जेठ २६ गते फाइनल खेल हुनेछ । पुरुष र महिला दुवैतर्फको विजेताले आठ लाख, उपविजेताले चार लाख र तेस्रो हुने टोलीले दुई लाख रुपैयाँ पाउनेछन् ।