काठमाण्डाै – प्रमुख प्रतिपक्ष दल नेकपा एमालेका अध्यक्ष केपी शर्मा ओलीले वर्तमान सरकारलाई बोकिरहन नसकिने टिप्पणी गर्नुभएकाे छ । वर्तमान सरकार देशका लागि निष्प्राण र हानिकारक दुवै भएकाले यसलाई बोकेर हिँड्न नसकिने अध्यक्ष ओलीको तर्क थियो । 

आज सोमवार ललितपुरमा आयाेजित विभिन्न सञ्चारमाध्यामका सम्पादकहरूसँगको अन्तरक्रियामा बोल्दै उहाँले सरकार चलेन, काम लागेन भन्ने स्पष्ट भइसकेको भन्दै यसलाई बोकिरहन उपयुक्त नहुने बताउनुभयो । उहाँले भन्नुभयो, ‘अब यो गठबन्धनको सरकार चलेन, काम लागेन भन्ने स्पष्ट भयो, यसैलाई बोकिरहन अब उपयुक्त हुँदैन । याे सरकार निष्प्राण भयो र हानिकारक छ । यस परमादेशी सरकारको कुनै अर्थ छैन । अहिले यत्ति भनाैँ । हामी सकेसम्म सहमतिको राम्रो बाटोमा जान चाहन्छौँ । भएन भने पनि देशलाई कुबाटोमा जानबाट रोक्ने कोसिस गर्छाैँ ।’

अध्यक्ष ओलीले सरकारका सबै अङ्ग झर्न लागेको र अर्थमन्त्री जनार्दन शर्माको राजीनामा त्यसैको दृष्टान्त भएको जिकिरसमेत गर्नुभयो । उहाँले देश सङ्घीय संसद् र प्रदेश सभाको चुनावमा प्रवेश गरिसकेकाले पनि परमादेशी वर्तमान सरकारको कुनै औचित्य नभएको दाेहाेर्‍याउनुभयाे ।