काठमाण्डाै - सातौँ प्रधानमन्त्री कप एनभीए राष्ट्रिय भलिबल लिगको फाइनल समीकरण पूरा भएको छ । 

आज सेमिफाइनल चरणका खेल सकिएसँगै फाइनल खेल्ने टोलीको टुङ्गो लागेको हो । फाइनलमा महिलातर्फ नेपाल पुलिस क्लब र एपीएफ क्लब तथा पुरुषतर्फ नेपाल पुलिस क्लब हेल्प नेपाल खेल्ने भएका छन् । 

महिलातर्फ आज भएको  खेलमा न्यु डायमण्ड स्पोर्ट्स एकेडेमी नेपाल पुलिससँग पराजित भएपछि एपीएफ फाइनलमा पुगेको हो । राष्ट्रिय खेलकुद परिषद् (राखेप) को कभर्डहलमा भएको खेलमा यस अघि नै फाइनलमा पुगिसकेको पुलिसले न्यु डायमण्डलाई सोझो सेटमा हरायो । 

पुलिस ५ खेलमा १५ अङ्कका साथ शीर्ष स्थानमा छ । नेपाल एपीएफ क्लब ५ खेलमा ४ मा जित र १ मा हारसहित ११ अङ्कका साथ दोस्रो स्थानमा रह्यो । 

यस्तै, पुरुषतर्फ आज भएको खेलमा विभागीय टोली त्रिभुवन आर्मी क्लबलाई ३–१ को सेटमा पराजित गर्दै हेल्प नेपाल फाइनलमा पुगेको हो ।

 हेल्प नेपाल ६ खेलमा अपराजित रहँदै १६ अङ्ककासाथ शीर्ष स्थानमा रह्यो । पुलिस ६ खेलमा ५ मा जित र १ मा हारकासाथ १५ अङ्कसहित दोस्रो स्थानमा रह्यो । फाइनल खेल भोलि हुनेछन् ।