बाँके – बाँकेमा सशस्त्र प्रहरीले तस्करीको सामान बरामद गरेपछि सामान ल्याउने व्यक्तिहरूसँग भएको झडपमा तीन जना घाइते भएका छन् ।

झडपमा परि बागेश्वरी गण बाँकेमा कार्यरत सशस्त्र प्रहरी सहायक हवल्दार बेदप्रसाद पाैडेल र सशस्त्र प्रहरी जवान गणेश बुढा तथा नेपालगञ्ज उपमहानगरपालिका–१४ बस्ने जहित हसमित घाइते भएका सशस्त्र प्रहरी नायब उपरीक्षक (डीएसपी) शैलेन्द्र थापाले बताउनुभयाे । यस्तै झडपबाट ना १ झ ५७४ नम्बरको गाडीमा क्षति पुगेकाे छ ।

हिजाे बिहीवार राति साढे ९ बजेतिर बाँकेको नेपालगञ्ज उपमहानगरपालिका–१६ चौलिका चोकबाट नम्बर ३० बागेश्वरी गण बाँकेको टोलीले चोरीपैठारीको विभिन्न सामान बरामद गरेको सशस्त्र प्रहरीले जनाएकाे छ । पूरा भन्सार तिरेको नपाएपछि सामान बरामद गरेको तर भन्सार छलीका ती सामान फिर्ता पाउनुपर्छ भनी ल्याउने व्यक्तिहरूले हुलहुज्जत गर्न खाेज्दा झडप भएकाे डीएसपी थापाले बताउनुभयाे ।

बरामद गरिएका हार्डवेयरका सामान, चामल तथा चिनी स्थानीय भन्सार कार्यालयमा बुझाउने प्रक्रियामा रहेको सशस्त्र प्रहरीले जनाएकाे छ ।